Ахсынньы 20 күнүгэр Хаҥалас улууһун Дьэр нэһилиэгэр Сергей Зверев—Кыыл Уола аатынан Үҥкүү тыйаатырын саха национальнай инструменнарын оркестра кэлэн, оскуола үөрэнээччилэригэр уонна олохтоохторго муусука бырааһынньыгын тэрийдэ.
Тыа дьоно, биһиги, үксүбүт маннык кэнсиэри анаан-минээн куоракка киирэн мээнэ көрбөт буолан, бу күн бүтүн оркестр тахсан кэнсиэрдээбитин бэрт сонургуу уонна дуоһуйа көрдүбүт-иһиттибит. Тыыннаах доҕуһуол диэни көрөн-истэн астынныбыт. Оркестр толоруутугар сахалыы, нууччалыы уо.д.а. норуоттар ырыаларын, музыкальнай айымньыларын бу тутан олорон истэр ураты эйгэни үөскэтэрин эппитинэн-хааммытынан ылынан бэркэ сэҥээрдибит. Артыыстарбыт да бэйэлэрин маастарыстыбаларын толору баһылаабыт дьон буолан, толоруулара да үчүгэйэ киһини сөхтөрөр буолар эбит. Эдэркээн оҕолор, оркестр солистара Владимир Боярскай, Виктор Винокуров-Дабайаан байааҥҥа оонньууллара эриэккэһин! Хомусчуттар Василена Шарина уонна Георгий Слепцов-Чаҕылхан толорор маастарыстыбалара үрдүгүн, кырдьык да виртуоз-хомусчут аатын ылыахтарын ылбыттар эбит. Тыйаатыр үҥкүүһүттэрэ толоруулара бу үчүгэйин!
Манна даҕатан эттэххэ, бу оркестр солистара кэргэннии Анна уонна Афанасий Томскайдар айар үлэлэрин уруккуттан сэргиибин. Музыкальнай дьиэ кэргэн тыйаатыр тутаах дьоно буолан үүнэн-сайдан тахсыбыттара киһини үөрдэр. Афанасий үлэтиттэн ураты нотанан оркестровка оҥорорун истэбит, билэбит. Анна саҕалааһынынан, салалтатынан «Кыл Саха» диэн оркестр иһинэн бөлөх тэринэн айымньылаахтык үлэлииллэринэн, дьоһун ситиһиилэрдээхтэринэн киэн туттабыт. Бу кэнсиэргэ «Кыл Саха» бөлөх дэҥҥэ көрөр төрүт инструменнарбытыгар сахалыы матыыптары толорбуттара омуна суох хас биирдии көрөөччү дууһатын кылын таарыйда.
Биир үөрүүлээҕэ бу ааттаах-суоллаах оркестр доҕуһуолунан оскуолабыт үөрэнээччилэрин «Дьэрэлий» академическай вокальнай ансаамбылын толоруутугар ырыаны иһиттибит. Ансаамбыл салайааччыта И.В. Протопопова бэйэтин идэтин толору баһылаабыт профессионал эрэ буолбатаҕын, улахан тэрийэр, көҕүлүүр дьоҕурун көрдөрдө. Оҕолорбут ырыаны толорор маастарыстыбалара үрдээн иһэриттэн үөрэбит уонна ситиһиилэрин чиҥэтэн иһиэхтэрэ диэн эрэнэбит. «Биһиги оҕолорбут «Муусука барыбытыгар» өрөспүүбүлүкэтээҕи бырайыак чэрчитинэн саха оркестрын кытары кэнсиэргэ бииргэ кыттар дьоллоннулар. Оҕолор оркестр тыыннаах доҕуһуолунан композитор Кирилл Герасимов «Сахам сирин халлаана» ырыатын толордулар. Оркестр иһинэн хаһыс да сылын ыытыллар «Саха оркестрын кытта муусука кэрэ эйгэтигэр» бырайыак баара көрөөччүнү үөрдэр. Кэнсиэри тэрийэн, иилээн-саҕалаан ыыппыт бу бырайыак ааптардарыгар, оркестр музыканнарыгар Валентина Колесоваҕа уонна Анисия Габышеваҕа махталбытын тиэрдэбит», — диэн «Дьэрэлийдэр» төрөппүттэрэ бэйэлэрин ис санааларын эттилэр.
Онон бу дьоро күҥҥэ кэнсиэр хас биирдии нүөмэрэ саала иһэ толору мустубут көрөөччүлэр махталларын туоһутунан, дохсун ытыс тыаһынан доҕуһуолланан ааста.
Тыа дьонугар маннык кэрэ түгэни бэлэхтээбит оркестр кэлэктиибигэр, салайааччы Николай Петровка, дирижер Анюта Ивановаҕа, бу улахан кэнсиэри тэрийбит Хаҥалас улууһун оҕо театральнай оскуолатын салайааччытыгар А.И. Афанасьеваҕа махтанан туран, өссө үрдүк таһымнаах үрдэллэргэ тахсар айымньылаах үлэни баҕарабыт.
Екатерина ЛЕБЕДЕВА, «Саха сирэ» хаһыат, edersaas.ru сайтка анаан