Бэҕэһээ “Уһуйуу бастыҥ быраактыката” өрөспүүбүлүкэтээҕи куонкурус буолла. Түмүккэ, уопсайа, 10 бастыҥ уһуйааччы таҕыста.
edersaas.ru
Эспиэрдэр бөлөхтөрүн бэрэссэдээтэлэ, Профессиональнай үөрэҕи сайыннарыы институтун дириэктэрин солбуйааччы Иннокентий Оконешников иһитиннэрбитинэн, куонкуруска, уопсайа, 27 сайаапка киирбититтэн, 10 бастыҥ уһуйааччыны сүүмэрдээбиттэр. Бэрэссэдээтэл уһуйуу модела олус элбэҕин бэлиэтиир. “Ол курдук, холобура, учуутал эдэр педагогу, уопуттаах маастар устудьуоннары кытта үлэлиир эбэтэр преподавателлэр устудьуоннары уһуйаллар”, — диэн этэр. Онон уһуйууну сыаналыырга хааччахтары киллэрэр кыаллыбат диэн быһаарар. Тоҕо диэтэххэ, уһуйуу баҕа өттүнэн буолуохтаах диэн кини ыйар.
Кыттааччылар бастакы түһүмэххэ бэйэлэрин тэрилтэлэригэр уһуйуу уопутун билиһиннэрдилэр. Иккис түһүмэххэ уһуйуу моделын оҥордулар.
Дьокуускайдааҕы килиэп комбинатын кондитер сыаҕын начаалынньыга, куонкурус муҥутуур кыайыылааҕа Татьяна Пшенникова: “Уһуйуу (наставничество) курдук куонкурус биһиги өрөспүүбүлүкэбитигэр ыытыллара олус үчүгэй. Маныаха ханыылыы төһөнөн элбэх куонкурустары тэрийэллэр да, соччонон уһуйааччылары бэйэлэрин да көҕүлүөх, уопуту тарҕатыыга да туһалаах буолуох этэ. Идэбин олус сөбүлүүбүн. Үөрэнээччилэрим ситиһиилэриттэн уонна кинилэргэ иҥэрбит билиибин ылыналларыттан, туһаналларыттан үөрэбин. Ити оҥорон таһаарыыга улахан көрдөрүү буолар.
Бүгүн саамай күүстээхтэр кытыннылар. Биһиги Дьокуускайдааҕы сервис технологическай тиэхиньикумун кытта бииргэ үлэлэспиппит быданнаата. Тус бэйэм, 2014 сылтан ыкса үлэлэһэбин, “Эдэр профессионаллар”, Абилимпикс куонкурустарга уонна демо-эксээмэҥҥэ тутулуга суох эспиэрдиибин. Устудьуоннары, бырактыкааннары уонна бэйэбит эдэр үлэһиттэрбитин уһуйабыт. Куонкурустан куттанымаҥ, кыттан иһиҥ”, — диэн үөрүүтүн үллэстэр.
“Уһуйуу бастыҥ быраактыката” куонкурус кыайыылаахтара:
1.Николаева Марина Вячеславовна (Дьокуускайдааҕы автодорожнай тиэхиньикум үрдүкү мэтэдииһэ)
2. Саенко Вера Олеговна (Саха сирин соҕурууҥҥу технологическай тиэхиньикумун преподавателэ)
3.Кондратьева Наталья Михайловна (Дьокуускайдааҕы медицинскэй кэллиэс дириэктэрин иитэр үлэҕэ солбуйааччы)
4.Хамаганова Татьяна Викторовна (Дьокуускайдааҕы медицинскэй кэллиэс үрдүкү мэтэдииһэ)
5. Кравченко Людмила Семеновна (Нерюнгритээҕи медицинскэй кэллиэс дириэктэрин быраактыкаҕа солбуйааччыта, идэ модулун преподавателэ)
6. Потапов Константин Николаевич (“Якутскмедтранс” тэрилтэ инженерэ, Дьокуускайдааҕы индустриальнай-педагогическай кэллиэс үөрэнээччилэрин уһуйааччы)
7. Ефимова Мария Николаевна (Жатайдааҕы тиэхиньикум математикаҕа преподавателэ)
8. Яковлева Мария Яковлева (Дьокуускайдааҕы сервис технологическай тиэхиньикумун преподавателэ, “Аһылык индустрията” профессиональнай-үөрэтэр кластер аатыттан)
9.Пшенникова Татьяна Владимировна (“Дьокуускайдааҕы килиэп кэмбинээтэ” АУо кондитерскай сыаҕын начаалынньыга).
Күн иккис аҥаарыгар “Уһуйуу института: кэлэр кэм туһугар үгэстэр уонна саҥаны киллэриилэр” диэн сэһэргэһии, ырытыһыы былаһаакката буолла. Манна кыттааччылар бары даҕаны уһуйуу ирдэнэрин, туһалааҕын ыйаллар, бэйэлэрин кэккэ санааларын этэллэр.
СӨ Үөрэҕин уонна наукатын миниистирин бастакы солбуйааччы Михаил Присяжнай:
—Уһуйааччыны сыаналыыр кэм кэллэ. Үөрэх анал тэрилтэлэригэр араас дьон үлэлии кэлэллэр. Ону таһынан биирдиилээн салааларга, тэрилтэлэргэ тиэхиньиичэскэй өттүнэн уларыта тутуулар даҕаны киирэллэр. Биһиги уһуйааччыны эмиэ саҥалыы хараҕынан көрөбүт. Билигин уһуйааччы тэрилтэҕэ эдэр исписэлииһи ылар эрэ киһи буолбатах, эрдэттэн үлэлэһиини ыытар, бэйэтин хайысхатын баһылаабыт уопуттаах киһи буолар. Аны уһуйааччы эдэр үлэһити эрэ кытта буолбакка, саастаах, идэтин хайысхатын уларыппыт, атын идэҕэ үөрэммит, биэнсийэҕэ даҕаны тахсаары сылдьар киһиэхэ эмиэ көмөлөһүөн сөп. Онон уһуйуу аныгы кэмҥэ улахан суолталаах, — диэн быһаарар.
Людмила ПОПОВА, “Саха сирэ” хаһыат, edersaas.ru