Россияҕа 2025 сылга уонна 2035 сылга Уһук Илини сайыннарыыга этиилэри хомуйуу салҕанар. Санатан эттэххэ, «Уһук Илиҥҥэ – мин этиилэрим» диэн бырайыак Саха Өрөспүүбүлүкэтин көҕүлээһининэн ыытыллар.
Ил Дархан Айсен Николаев «бу программаны аҕыйах профессионал да суруйара табыгаһа суох. Программаны нэһилиэнньэни, эскпертнэй холбоһугу, уопсастыбаннай түмсүүлэри кытары булгуччу дьүүллэһэр, ырытыһар наада. Төһөнөн элбэх киһи үчүгэйдик, дириҥник ылынан өйдүүр да, соччонон ырытан оҥорорго, олоххо киллэрэргэ, көдьүүстээх түмүктээх буолуоҕа» диэн бэлиэтиир.
Уһук Илини сайыннарыы национальнай программата национальнай бырайыактары, госпрограммалары, биэдэмистибэлэр уонна инфраструктурнай хампаанньалар уһун болдьохтоох былааннарын, Уһук Илин бары регионнарын сайдыыларын стратегияларын холбуу түмүөхтээх. Сүрүн хайысхалар ортолоругар — социальнай эйгэни (ОДьКХ, тырааныспар, доруобуйа харыстабыла, культура, спорт), науканы уонна экономиканы сайыннарыы киирэллэр.
Программа 2019 сыл балаҕан ыйын 1 күнүгэр диэри оҥоһуллан бэлэм буолуохтаах уонна Россия президенин ыйааҕынан бигэргэтиллиэхтээх. Россия президенэ Владимир Путин сорудаҕы 2018 сыл балаҕан ыйыгар Илиҥҥи экономическай IV-с форумҥа биэрбитэ.
Этиилэри Саха Өрөспүүбүлүкэтин Ил Дарханын Айсен Николаев сайтыгар http://aisennikolaev.ru/ эбэтэр СИА сайтыгар https://ysia.ru/predlozheniya-po-natsionalnoj-programme-razvitiya-dalnego-vostoka/ ыытыаххытын сөп.