Социальнай ситимҥэ Ульяновскайдааҕы собуокка «УАЗ-3170» саҥа кроссовер оҥоһуллан тахсыбытын туһунан сонун тилийэ көттө. Хаартыскатыгар көрдөххө, маҥан кузовтаах, кырдьык, олус намчы гына оҥорбуттар. Этэргэ дылы, омук кроссовердарыттан туох даҕаны атына суох.
Александр ТАРАСОВ, «Саха сирэ» хаһыат, https://edersaas.ru
Бу массыына Тимир көлөнү научнай-чинчийэр институт («НАМИ) 2016 сыллаахха оҥорбут эскииһигэр олус майгынныыр диэн быһаарбыттар. Ити кэнниттэн саҥа «УАЗ-3170» инники өттүгэр оҥоһуллан тахсарыгар адьас атын буолуо диэн иһитиннэрии тахсыбыта. Ол эбэтэр Ульяновскай собуот ити институт эскииһинэн оҥорортон аккаастаабыт.
Кэлиҥҥи иһитиннэриинэн, араамата суох бастакы УАЗ массыына техническэй бырайыага 2017 сыл ыам ыйыгар оҥоһуллан бүтүөхтээх. Собуокка 2020 сылга оҥоһуллуохтаах. Ол гынан баран, саҥа тимир көлөнү оҥоруу «тоҥоруллубун» туһунан сайтарга эттилэр. Ол оннугар Ульяновскай собуот «УАЗ-Патриоту» лаппа саҥардан биэрэргэ туруммут.
Саха сиригэр «УАЗ» массыынаны күүскэ атыылаабыт «КОЛМИ» тэрилтэттэн саҥа кроссовер дьылҕатын ыйыттым.
«КОЛМИ» бэрэстэбиитэлэ:
— Соторутааҕыта Ульяновскай собуотун куратора кэлэн барда. Кини бу саҥа кроссовер оҥоһуллара биллибэт диэбитэ.
Ол аата, кырдьык, саҥа «УАЗ» массыынаны оҥорууттан аккаастаммыттара чуолкай эбит диэн санааҕа кэлиллэр. Ол гынан баран, ити эппиэт чуолкай буолуон сөбүгэр киһи саарбахтыыр. Онон саҥа кроссовер күн сирин көрөрүн-көрбөтүн кэм-кэрдии көрдөрүөҕэ.
Александр ТАРАСОВ, «Саха сирэ» хаһыат, https://edersaas.ru