«УАЗ»-ик тимир көлөлөөхтөр сылын аайы куоталаһаллар. Аны туран, быйыл маннык хабааннаах куоталаһыы Сунтаарга, Үөһээ Бүлүүгэ, Тааттаҕа ыытылыннылар.
Александр ТАРАСОВ, «Саха сирэ» хаһыат, edersaas.ru
Быйыл «Хаар айан» күрэхтэһиини түмүктүүр курдук тэрээһин Дьокуускай куорат Күөх хонуутугар ыытылла турар. Дьокуускай куорат төрүттэммитэ 385 сылыгар ананна. 53 хамаанда «экстрим» түһүмэххэ 500, 600, 700 уонна 800 м куоталаһа сылдьар. Сарсын, кулун тутар 26 күнүгэр, «Хаар Айан-2017» күрэхтэһии чөмпүйүөнэ биллиэҕэ.
Иннокентий Барашков, бырайыак ааптара:
– Бириис уопсай пуондата 530 тыһ. солк. Кыттааччылары икки бөлөххө араардыбыт: карбюратордаахтар уонна инжектордардаахтар диэҥҥэ. Сылын аайы хамаандалар көхтөөхтүк кытталлар. Кыттааччылар анаан-минээн сыл устата бэлэмнэнэллэрэ махталлаах дьыала.
Ыспыраапка:
Маҥнайгы «Хаар айан» күрэхтэһии 2003 сыллааха Чурапчы улууһун Төлөйүгэр ыытыллыбыт, 5 «УАЗ» кыттыбыт. Бириис пуондата 1 тыһ. солк. эбит. 2005 сыллаахха тэрээһини ыытыыга «КОЛМИ» ХЭУо кыттыспыт. Кэлиҥҥи кэмҥэ Россия үрдүнэн «УАЗ»-ик массыыналары куоталаһыннарар бренд буолан эрэр.
Александр ТАРАСОВ, «Саха сирэ» хаһыат, edersaas.ru