Убаһа бириистээх күрэхтэһиигэ кынаттаах кылыыһыт Иван Пестряков кыайыылаах таҕыста
Ааспыт субуотаҕа, алтынньы 14 күнүгэр, Дьокуускайга “Юность” чэпчэки атлетика манеһыгар атах оонньуутугар Гаврил Григорьев бирииһигэр күрэхтэһии буолла.
Өрөспүүбүлүкэтээҕи федерация, Манчаары Баһылай аатынан спорт национальнай көрүҥнэрин киинин, Таатта улууһун дьаһалтатын, спорка кэмитиэтин, Гаврил Гаврильевич аймахтарын көҕүлээһиннэринэн, тэрийиилэринэн сүүрбэ иккис төгүлүн ыытыллыбыт тэрээһиҥҥэ чугастааҕы улуустартан, университеттан, спорка үрдүкү маастарыстыба оскуолатыттан, Дьокуускайдааҕы педколледжтан, «Модун» спорткомплекстан 64 спортсмен, ол иһигэр 22 спорт маастара, кылыыга, ыстаҥаҕа, куобахха сэттэ туоска илин былдьаста.
Дьахталларга Любовь Унарова (Ялина) (Дьокуускай), Сайыына Салышева (Уус Алдан), Юлия Кобякова (ХИФУ) кыайыылааҕынан буоллулар.
Уолаттарга Илья Яковлев (Бүлүү), Сергей Собакин (Чурапчы), Дмитрий Дмитриев (Мэҥэ Хаҥалас) бастаатылар.
Улахан дьоҥҥо өрөспүүбүлүкэ бастыҥ кылыыһыттара — Уус-Алдантан Иван Пестряков уонна Чурапчыттан Кай Адамов эрбии тииһинии эристилэр. Кылыыга барыллааһын ыстаныыларга Кай Адамов 30 м 44 см көрдөрүүлээх инники испитин, финалга Иван Пестряков бүтэһик ойуутугар 30 м 56 см түһэн куоһарда. Яков Дмитриев 29 м 31 см – үһүс буолла.
Ыстаҥаҕа 29 м 62 см көрдөрүүлээх И. Пестряков бастаата. К. Адамов (29 м 25 см) — иккис, Я. Дмитриев (29 м 02 см) үһүс буоллулар.
Куобахха «Модун» инструктор-тириэньэрэ Мичил Яковлев 25 м 82 см түһэн бастаата. Андрей Васильев иккис миэстэҕэ таҕыста — 24 м 88 см. Иван Пестряков үһүс булла — 24 м 56 см.
Үс көрүҥ түмүгүнэн Иван Пестряков 84 м 74 см көрдөрүүлээх бастаата уонна убаһанан бириэмийэлэннэ. Кай Адамов (84 м 17 см) — иккис, Яков Дмитриев (82 м 85 см) — үһүс буоллулар.
Кыайыылаахтарга уонна миэстэлэспиттэргэ атах оонньуутугар Тааттаттан бастакы спорт маастара Гаврил Григорьев мөссүөннээх өйдөбүнньүк мэтээллэр, дипломнар, сыаналаах бириистэр, харчынан бириэмийэлэр туттарылыннылар.
Роман Попов, “Саха сирэ” хаһыат, edersaas.ru