Арҕаа Сибиирдээҕигэ хабааннаах ниэптээх, гаастаах сирдэр сотору кэминэн Илиҥҥи Сибииргэ, Саха сирин арҕаа өттүгэр аһыллыахтара. Бу туһунан аҕыйах хонуктааҕыта Ниэп, гаас геологиятын уонна геофизикатын институтун научнай салайааччыта, РАН академига Алексей Конторович Сибиирдээҕи уокурукка РФ бэрэсидьиэнин боломуочуйалаах бэрэстэбиитэлэ Сергей Меняйлоны кытта көрсүһүүтүгэр эттэ.
Роман Попов, “Саха сирэ” хаһыат, https://edersaas.ru
Новости РИА тарҕаппыт иһитиннэриитинэн, Саха сиригэр “Бүлүүтээҕи синеклиза” дэнэр бөдөҥ гаастаах сир арыллыаҕа диэн буолар. Манна гаас быһа холоон 7 – 8 биэрэстэ дириҥҥэ сытар. Синеклиза соҕуруулуу-арҕаатыгар, Өлүөхүмэ улууһун Чаара – Токко түөлбэтигэр баар сир баайдаах оройуон биир кэскиллээҕинэн ааҕыллар. Алексей Конторович салгыы чинчийэр үлэни ыытыы ирдэнэрин, билигин туһааннаах докумуоннары бэлэмнээн, РФ Айылҕа ресурсаларыгар министиэристибэтигэр тиэрдиэхтэрин эттэ.
Маны сэргэ академик Өлүөнэ өрүс тардыытыгар бөдөҥ ниэптээх сир туһунан матырыйааллары учуонайдар Арассыыйа Айылҕа ресурсаларыгар министиэристибэтигэр, ниэп хампаанньаларыгар тиксэрбиттэрин туһунан кэпсээтэ, онно кэнэҕэһин бөдөҥ ниэптээх оройуон баар буолуон сөбүн ыйда.
Алексей Конторович бигэргэтэринэн, аны 10 – 15 сылынан Арҕаа Сибиири сэргэ Илиҥҥи Сибиир дойду ниэп, гаас бырамыысыланнаһын тирэҕинэн буолуоҕа.
Роман Попов, “Саха сирэ” хаһыат, https://edersaas.ru