Учуутал үөрэнээччини төбөҕө охсубут

Ааптар: 
Бөлөххө киир:

Урут, сэбиэскэй кэмҥэ, учуутал үөрэнээччини укааска маһынан төбөҕө охсоро эбэтэр ытыһынан кэтэххэ биэрэрэ — кими да ороһуппат чахчы, буолуохтааҕын курдук этэ. Оттон билигин итинник сыһыан иһин дьыалаҕа эриллиэххэ сөп.

edersaas.ru

Сунтаар улууһун борокуратууратыгар биир ийэ сайабылыанньа киллэрбит. Төрдүс кылааска үөрэнэр 10 саастаах кыыһын учуутала хаста да төбөҕө охсубутун туһунан. Борокуратуура бу чахчынан бу бэрэбиэркэ ыыппыт.

Бэрэбиэркэ быһаарбытынан, алын кылаас учуутала 4-с кылаас оҕолорун үөрэтэр кэмигэр биир үөрэнээччи кини сэмэлиирин истибэтин иһин хаста да төбөҕө охсубут. Буолаары буолан, 2016 — 2017 үөрэх сылларыгар бу учуутал эмиэ ити кыысчааны итинник хаста да охсо сылдьыбыттаах эбит.

Ити дьайыыларынан учуутал ааттаах киһи, оҕоҕо эт-сиин эмсэҕэлээһинин оҥорбутун ааһан, кыыһы үөҕэн-саҥаран, чиэһин уонна дьоһунун түһэрбит.

Борокуратуура бэрэбиэркэ матырыйаалларын силиэстийэ уорганнарыгар ыыппытын түмүгэр, РФ Холуобунай кодексатын 156-с ыстатыйанан, ол эбэтэр, педагог сокуоннай сааһын ситэ илик оҕолору иитэр эбээһинэстэрин толорботоҕун, ону ааһан, кырыктаахтык сыһыаннаспытын иһин, холуобунай дьыала тэриллибит.

Дьыаланы силиэстийэлээһин борокуратуура хонтуруолугар сылдьар.

Бу туһунан СӨ Борокуратууратын пресс-сулууспата иһитиннэрдэ.

Манна даҕатан эттэххэ, биһиги сайтпытыгар бу дьыл тохсунньу 22 күнүгэр «Оҕолор айахтарын скотчунан бүөлээбит» диэн матырыйаал бэчээттэммитэ.

Онно Айхал бөһүөлэгэр оҕо саадын иитээччитэ оҕолор айахтарын скотчунан бүөлээн, эмиэ ити холуобунай ыстатыйанан суут иннигэр эппиэттээн, ыстараап төлүүргэ ууруллубутун уонна 2 сыл устатыгар үөрэх тэрилтэлэригэр дуоһунастаах үлэҕэ үлэлиир бырааба быһыллыбытын туһунан суруйбуппут.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0