Учуутал олоҕо үөрэнээччилэригэр салҕанар

Бөлөххө киир:

Саха сирин үөрэхтээһинэ улахан сүтүктэннэ. Дьоукуускай куораттааҕы национальнай гимназия дириэктэрэ, куорат усулуобуйатыгар оҕону төрөөбүт тылынан иитэр-үөрэтэр үөрэх кыһатын төрүттэспит дьонтон биир бастакылара, СӨ үөрэҕириитин үтүөлээх үлэһитэ, философскай наука кандидата  Николай Константинович ЧИРЯЕВ өллө.

Үйэ чиэппэрин кэриҥэ кэм устата кини национальнай оскуоланы атаҕар туруорда, сайыннарда. Биир санаалаах педкэлэктиип, 1992 сыллаахха анал дьиэтэ да суох сылдьан, үлэтин Оҕо дыбарыаһыттан саҕалаан, куорат араас сирдэринэн дьарыктанан, маннык үөрэх кыһата наада, диэн дакаастаан, куорат киинигэр бэртээхэй гимназия дьиэтэ тутулларын ситиспитэ.  Николай Константинович салалтатынан, үөрэхтээһиҥҥэ-иитиигэ үгэс буолбут уонна аныгы ньымалары туһанан, научнайдык киирэн, Дьокуускай куораттааҕы национальнай гимназия оҕону үөрэхтээһиҥҥэ, лиичинэс быһыытынан сайыннарыыга ситиһиитэ үгүс.

Гимназия иһинэн ХИФУ омук тылларыгар факультетын, СӨ Национальнай художественнай мусуойун, СӨ Бэрэсидьиэнин билитиэкэтин филиаллара аһыллыбыттара. Гимназия оҕолоро нуучча, саха тылларын таһынан араас омук – английскай, ньиэмэс, француз, японскай, кытай тылларын үөрэтэллэр. Сайдыы, тылы үөрэтии эйгэтин кэҥэтии биир сүрүн түһүмэҕинэн  саха тылынан үөрэтэр “Айыы кыһата” филиалы уонна ньиэмэс, английскай тылларын дириҥэтэн үөрэтэр Саха гимназиятын аһыы буолбута.

Николай Константинович оҕолору олус таптыыра, үөрэнээччилэринэн, выпускниктарынан мэлдьи киэн туттара. Кини олоҕо, кини дьыалата иитэн таһаарбыт ыччаттарыгар салҕанар.

Дьиэ кэргэнигэр, оҕолоругар, чугас дьонугар, гимназия кэлэктиибигэр дириҥ кутурҕаммытын биллэрэбит.


Ыспыраапка:

Чиряев Николай Константинович

1958 сыллаахха бэс ыйын 10 күнүгэр Үөһээ Бүлүүгэ биллиилээх педагог, Ороһутааҕы норуот педагогикатын мусуойун төрүттээччи, «Саха сирин норуодунай педагогиката»  Ассоциация бастакы бэрэсидьиэнэ, САССР үтүөлээх учуутала К.С.Чиряев дьиэ кэргэнигэр төрөөбүтэ.

СГУ биолого-географическай факультетын үөрэнэн бүтэрбитэ. Дьокуускай куорат 2 N-дээх орто оскуолатыгар айымньылаахтык үлэлээбитэ. 1992 с. Дьокуускай куораттааҕы национальнай гимназия дириэктэринэн анаммыта.

Н.К.Чиряев – Саха Өрөспүүбүлүкэтин үөрэхтээһинин үтүөлээх үлэһитэ, СӨ үөрэҕириитин туйгуна, “Саха-Азия оҕолоро” Норуоттар икки ардыларынааҕы оҕо фондатын стипендиата, СӨ “Барҕарыы” Национальнай фондатын, «Во славу и пользу республики» фондатын лауреата.

+1
0
+1
0
+1
0
+1
0
+1
0
+1
0
+1
0