close

Учууталлар аттестацияларын саҥа модела
Кыһа - Олох-дьаһах

Учууталлар аттестацияларын саҥа модела

Ааспыт нэдиэлэҕэ дойду Үөрэҕин министиэристибэтигэр учууталларга аттестация моделын киллэрии тула уопсастыбаннай-профессиональнай ырытыһыы буолан ааспыта. Кэмпириэнсийэҕэ Арассыыйа 73 субъегыттан 350 киһи кытынна.


edersaas.ru

Манна үөрэх Профсойууһуттан, Рособрнадзор салалтатыттан саҕалаан, көннөрү педагогтарга тиийэ кытыннылар. Үөрэх миниистирэ Ольга Васильева, учууталлар аттестацияларын моделин бүтэһиктээх барыйаана уопсастыбаннас киэҥ араҥатыгар кэпсэтии кэнниттэн биирдэ бигэргэниэҕэ диэтэ. “Эһиги көмөҕүтүнэн, учууталлар профессиональнай таһымнара үрдүүрүгэр чахчы көҕүлүүр кыахтаах итиэннэ портфолио уонна да атын араас докумуон хомуйуута суох аттестацияны олорор миэстэлэригэр баралларын хааччыйар моделы оҥоруохпутун баҕарабыт. Аттестация бүтэһиктээх барыйаана 2020 сылга бигэргэниэҕэ”, — диэн иһитиннэрдэ. Итиэннэ аттестация педагог үлэтин хаачыстыбатын, кини идэтин толору баһылааһынын көрдөрүөхтээх уонна учууталга төһө кыалларынан судургу, өйдөнөр, салгыы сайдалларын быһаарар буолуохтаах диэн этэр.

Учуутал таһымын үрдэтии национальнай систиэмэтэ бэйэ-бэйэтиттэн ыкса ситимнээх элэмиэннэртэн — аттестацияттан, квалификацияны үрдэтииттэн, педагогическай үөрэхтэн, педагог профессиональнай стандардыттан, учуутал идэтин өрө тутууттан турарын ыйда.

Итини таһынан, учуутал дуоһунаска өрө тахсыыта бастакы уонна үрдүкү квалификациялаах категория итиэннэ “Старшай учуутал”(методист) уонна “салайар учуутал” (наставник) быһыытынан сайдыаҕа диэн эттэ. Быһатын эттэххэ, “Старшай учуутал” уонна “салайар учуутал” диэн дуоһунастар киирэн биэриэхтэрэ.

Миниистир, бу кэпсэтии кэмигэр медиктэргэ курдук, педагог үлэлии киирэригэр “эксээмэн” баар буолуохтаах диэн санаалааҕын быктарда. Эрдэ биллэриллибитин курдук, учууталлар квалификацияларын таһымын бэйэлэрэ сыаналыылларын, туох итэҕэстээхтэрин быһаарар инниттэн, тутулуга суох аттестациялыыр кииннэри тэрийэр былааннаахтар.

Манна даҕатан эттэххэ, Саха сиригэр быһа холоон, учуутал үс гыммыт биирэ эрэ үрдүк категориялаах. Итини үөрэх үлэһиттэрин атырдьах ыйынааҕы мунньахтарын иитинэн буолан ааспыт панельнай дискуссия кэмигэр эмиэ бэлиэтээн тураллар.

 

Людмила ПОПОВА, “Саха сирэ” хаһыат, edersaas.ru

#бүгүн: 1
5
0

Сайт матырыйаалларын ааптар көҥүлэ суох ылар бобуллар.