Атырдьах ыйын 14-18 күннэригэр Дьокуускай к. ыытыллар үөрэх уонна наука үлэһиттэрин атырдьах ыйынааҕы киэҥ ыҥырыылаах мунньаҕа «Үөрэх систиэмэтин сайыннарыы: дьоһун суолталаах хайысхалар уонна иитии быраактыкатын саҥардыы» диэн тиэмэҕэ ананар.
Атырдьах ыйын 14-15 күннэригэр муусука уонна ойуулуур-дьүһүннүүр искусство учууталларын форума туспа бырагырааманан ыытыллыбыта.
Пленарнай мунньаҕа бүгүн 17.00 «Сэргэлээх уоттара» култуура киинигэр буолар. Быйылгы мунньах дьаһаллара, мэлдьи да буоларын курдук, олус киэҥнэр уонна дьоһун суолталаахтар. Ол курдук, учуутал вакансиятын дьаарбаҥкатыгар учууталлары үлэҕэ ылыыга дуогабардар түһэрсилиннилэр.
Мунньах кыттыылаахтара, үөрэхтээһин муниципальнай тэриллиилэрин бэрэстэбиитэллэрэ Бэчээт дьиэтигэр оҕону дьиэ кэргэҥҥэ иитии бастыҥ үөрүйэхтэрин билистилэр. Төрөппүттэр аһаҕас мунньахтарыгар үөрэх идэлээх тэрилтэлэригэр бизнес-инкубатор бырайыагын оҥордулар. СӨ Үөрэххэ уонна наукаҕа министиэристибэтин уопсастыбаннай сэбиэтэ кыттыылаах «төгүрүк остуолга» үөрэх өҥөтүн хаачыстыбатын сыанабылларын дьүүллэстилэр.
Атырдьах ыйын 17 күнүгэр Бырабыыталыстыба 2 №-дээх дьиэтигэр улахан сессияҕа үөрэх уонна наука систиэмэтин дьоһун суолталаах бырайыактарын олоххо киллэрии механизмнарын чопчулуохтара. Үөрэх идэлээх тэрилтэлэрин дириэктэрдэрэ СӨ үөрэҕин миниистирин кытары көрсүөхтэрэ.
Атырдьах ыйын 18 күнүгэр «Үөрэх эйгэтигэр федеральнай судаарыстыбаннай кэтээн көрүү: кыһалҕалар, түмүктэр, быраап төрүөттэрэ» мунньах ыытыллыаҕа. Үөрэх идэлээх тэрилтэлэрин бырайыактарын билсиэхтэрэ. РФ Президенэ Владимир Путин «Оҕо саас уон сылын РФ-га биллэрии туһунан» Ыйааҕын олоххо киллэриини дьүүллэһи мунньаҕа Уһук Илиҥҥи уокурук субъектара кыттыылаах ыытыллыаҕа.
Надежда ЕГОРОВА, «Саха сирэ» хаһыат, edersaas.ru