Кэлиҥҥи кэмҥэ Саха сиригэр спорт сайдан, саҥа спорт комлекстара тутулланнар, улахан таһымнаах күрэхтэһии ыытыллара элбээтэ. Дьон тыҥааһыннаах киирсиилэри илэ көрөллөрүн туохтааҕар да ордороллор.
edersaas.ru
Ол курдук, алтынньы 12-21 күннэригэр Дьокуускайга буоксаҕа Арассыыйа чөмпүйэнээтэ ыытыллыахтаах. Бачча улахан таһымнаах күрэхтэһиини ама ким көрүөн баҕарбат буолуой. Өрөспүүбүлүкэбит араас улуустарыттан дьон-сэргэ сытыы охсуулары, чаҕылхай киирсиилэри көрө кэлиэхтэрэ. Бу күннэргэ күрэхтэһиини тэрийээччилэр киирэр билиэт сыанатын бигэргэттилэр. Ол курдук, бастакы киирсиилэри көрөр билиэт сыаната 200 солкуобай. Финал аҥаардааҕы киирсиилэргэ билиэт сыаната 400 солкуобай. Оттон дьэ, финалы илэ-харахпытынан көрөр туһугар 600 солкуобайы төлүөхпүт.
Киирбит үбү чөмпүйэнээт ороскуотун сабарга ыыталлар. Улахан күрэхтэһии эрээри, билиэт сыаната лаппа чэпчэки. Атын чөмпүйэнээттэргэ тыһыынчанан сыаналаах буолааччы. Чөмпүйэнээт буолара чугаһаатаҕына, билиэттэр атыыга тахсыахтара.
Дойдубутугар буолар күрэхтэһиини күүтэбит!
Николай Попов, «Саха сирэ» хаһыат, edersaas.ru