Саха Өрөспүүбүлүкэтин спортивнай тустууга федерациятын бирииһигэр көҥүл тустууга аһаҕас турнирга Саха сирин, Монголия уонна Казахстан күүстээх бөҕөстөрө кыттыахтара.
Роман ПОПОВ, “Саха сирэ” хаһыат, edersaas.ru
Ыам ыйын 26 күнүгэр “Триумф” спорт киинигэр буолар түһүлгэҕэ дойду чөмпүйэнээтигэр бэлэмнэнэ сылдьар Саха сирин сүүмэрдэммит хамаандатын чилиэннэрэ күүстэрин холоһуохтара, бэлэмнэрин тургутунуохтара.
“Триумф” көбүөрүгэр Монголия чулуулара: Азия 2017 сыллааҕы чөмпүйэнээтин үрүҥ көмүс призера Занданбуд Занабазар (57 кг), “Моngolia Open” норуоттар икки ардыларынааҕы турнир икки төгүллээх кыайыылааҕа, Азия былырыыҥҥы чөмпүйэнээтин боруонса призера Туменбилег Тувшинтулга (65 кг) уонна аан дойду икки төгүллээх чөмпүйүөнэ Мандахнаран Ганзориг (70 кг) тахсан тустуохтара. Ону сэргэ Казахстан сүүмэрдэммит хамаандатыттан Д. Кунаев кэриэһигэр күрэхтэһии призера, Казахстан чөмпүйүөнэ Нурлан Турган (65 кг), ыччаттарга Азия 2009 сыллааҕы чөмпүйүөнэ, А. Медведь, Д. Кунаев турнирдарын кыайыылааҕа Саятбек Окасов (65 кг), Бурятия бэрисидьиэнин бирииһигэр норуоттар икки ардыларынааҕы күрэс үрүҥ көмүс призера Амандык Бакеев (65 кг) кэлэллэрэ күүтүллэр.
Күрэхтэһии үс көбүөрүнэн ыытыллыаҕа. Бөҕөстөр биэс ыйааһынынан — – 61, 65, 70, 74 уонна 86 киилэҕэ диэри – тустуохтара.
Тэрийээччилэр иһитиннэрбиттэринэн, ыйааһыннарыгар бастаабыттар 10 тыһыынча, иккис, үһүс буолбуттар туһааннааҕынан сэттэ уонна биэс тыһыынчанан биһирэниэхтэрэ.
Хапсыһыылар ыам ыйын 26 күнүгэр сарсыарда 10 чаастан саҕаланыахтара. Күнүс 11 чаастан турниры үөрүүлээхтик арыйыы буолар. Киириитэ – босхо.
Роман ПОПОВ, “Саха сирэ” хаһыат, edersaas.ru