close
Улуус чөмпүйэнээтигэр нэһилиэк баһылыктара кытта хапсаҕайдастылар...
Дьулуур - Олох-дьаһах - Тыа сирэ

Улуус чөмпүйэнээтигэр нэһилиэк баһылыктара кытта хапсаҕайдастылар

Таатта улууһугар чэгиэн-чэбдик олох уонна спорт сылынан, комплекснай спартакиада зачетугар хапсаҕай чөмпүйэнээтэ Игидэй нэһилиэгэр  буолла. Күрэхтэһии үрдүк тэрээһиннээхтик, олус сэргэхтик ыытыллан, дьон-сэргэ улаханнык астыммыт. Сиһилии улуустааҕы спорт кэмитиэтин салайар Гаврил Вырдылин кэпсиир.

edersaas.ru


—Хапсаҕайбыт чөмпүйэнээтин  сыл аайы ыһыахха тэрийэн ыытар үгэстээхпит. Ол гынан баран, быйыл П.Алексеев аатынан Саха сирин хапсаҕайдьыттарын чөмпүйэнээтэ Хаандыгаҕа кулун тутарга буоларынан, онно бэлэмнэнэ таарыйа  эрдэ тэрийдибит. Тоҕус нэһилиэктэн уопсайа 113 спортсмен күөн көрүстэ.  Эр дьоннор, бэтэрээннэр 11 ыйааһыҥҥа күрэхтэстилэр.  Дьэ, кырдьык, хапсаҕай ураты хамсаныылара, чаҕылхай киирсиилэрэ манна буоллулар.  Иэмэх мастыы эриһии кэнниттэн, түмүккэ Ытык Күөл хамаандата бастаата. Иккискэ Туора Күөл хапсаҕайдьыттара таҕыстылар. Үсүһү Дьохсоҕон спортсменнара ыллылар.

Кыайыылаахтарга бастакы миэстэҕэ 5000 солк.,  иккискэ — 3000 солк.,  үһүскэ — 2000 солк. харчынан бириэмийэлэри хапсаҕайга Саха сирин федерациятын вице-президенэ, Таатта улууһун хапсаҕайга федерациятын салайааччы, «Төлөн» ААУо генеральнай дириэктэрэ  Прокопий Рахлеев дохсун ытыс тыаһыгар доҕуһуоллатан туттарда. «Кэскилээх хапсаҕайдьыт» анал ааты ылбыт Александр Габышевка (Дэбдиргэ), «Чаҕылхай хапсаҕайдьыт» — Александр  Халыевка (Харбалаах) СӨ үөрэх  уонна наука министиэристибэтин үөрэх сайдыытын хааччыйар киинин салайар  Владимир Аржаков уонна  «СӨ ОДьКХ» ГУТ бэрэстэбиитэлэ  Мария Аргунова ноутбуктары туттардылар.

Муҥутуур кыайыылааҕы  быһаарар хапсыһыы финалыгар Харбалаах ыччаттара  Дмитрий Рахлеев уонна Александр Халыев  таҕыстылар. Тыҥааһыннаах киирсиигэ  Александр утарылаһааччытын  атахха киирэн охторон, Таатта улууһун хапсаҕайыгар муҥутуур кыайыылааҕынан буолла. Киниэхэ улуус баһылыга Михаил Соров уран оҥоһуулаах батыйаны  туттарда.

Быйылгы күрэхтэһии олус сэргэхтик, көхтөөхтүк, үөрүүлээхтик барда. Дьохсоҕон нэһилиэгин баһылыга Петр Захаров оҕо сааһын санаан, адьас турунан туран, эр дьоҥҥо 90 кг үөһэ ыйааһыҥҥа хапсаҕайдаста.  Кинини сэргэ, эмиэ тустубут эрчимнээх кэмнэрин эргитэн,  Чымнаайы баһылыга Егор Васильев бэтэрээннэргэ (90 кг) көбүөргэ киирдэ.  Иккиэн да бэркэ хапсаҕайдаһаннар, көрөөччүлэр хайҕалларын ыллылар, бэл, хас биирдии хамсаныылара, албастара ытыс тыаһынан арыалланна, — диэн кэпсиир Гаврил Вырдылин.

Ити курдук улуустааҕы физкультура уонна спорт кэмитиэтин тэрийиитинэн,  хапсаҕайга улуус чөмпүйэнээтэ үрдүк таһымнаахтык ааспыт. Күрэхтэһии түһүлгэтигэр мустубуттарга анаан акция ааттааҕа ыытыллыбыт. Онно булт, балык тэрилигэр тиксибиттэр өттүк харалаах, илии тутуурдаах үөрэн-көтөн дьиэлээбиттэр.

Кэпсэтиибит түмүгэр, Гаврил Вырдылин комплекснай спартакиада көрүҥэ сүүрбэҕэ тиийбитин, күрэхтэһии сыл ахсын далааһыннанан иһэрин, спордунан дьарыктанааччылар ахсааннара лаппа эбиллибитин эттэ. Ол туоһутунан улууска спорт маастара элбээбитин бэлиэтээтэ.

Сардаана БАСНАЕВА, «Саха сирэ» хаһыат, edersaas.ru

Хаартыскаларга Альберт ПОПОВ түһэриитэ.

 

 

 

Чөмпүйэнээт түмүктэрэ

55 кг Эр дьоҥҥо

1 м. Дуракинов Ньургустан (Дьохсоҕон), 2 м. Харайданов Петр (Дьохсоҕон), 3 м. Нестеров Артем (Дэбдиргэ).

62 кг

1 м. Попов Асам (Ытык Күөл), 2 м. Габышев Александр (Дэбдиргэ), 3 м. Сергучев Николай (Туора Күөл).

70 кг

1 м. Басов Исмаил (Ытык Күөл), 2 м. Васильев Юрий (Харбалаах), 3 м. Никифоров Михаил (Дэбдиргэ).

80 кг

1 м. Андреев Андрей (Ытык Күөл), 2 м. Саввин Евгений (Туора Күөл), 3 м. Собакин Иван (Уолба).

90 кг

1 м. Халыев Александр (Харбалаах), 2 м. Иванов Павел (Харбалаах), 3 м. Осипов Геннадий (Туора Күөл).

90 кг үөһээ

1 м. Рахлеев Дмитрий (Харбалаах),  2 м. Ефимов Евгений (Ытык Күөл), 3 м. Лопатин Георгий (Ытык Күөл).

60 кг (Бэтэрээннэргэ)

1 м. Слепцов Сергей (Туора Күөл), 2 м.  Винокуров Софрон (Харбалаах), 3 м. Сабарайкин Дмитрий (Кыйы).

70 кг

1 м. Максимов Иван (Дьохсоҕон), 2 м. Кривошапкин Гаврил (Дэбдиргэ), 3 м. Ушницкий Алексей (Чөркөөх).

80 кг

1 м. Аввакумов Вячеслав (Чөркөөх), 2 м. Габышев Валерий (Дэбдиргэ), 3 м. Попов Иван (Ытык-Күөл).

90 кг

1 м. Малышев Егор (Дьохсоҕон), 2 м. Бурмистров Василий (Ытык Күөл), 3 м. Меркурьев Анатолий (Туора Күөл).

90 кг үөһээ

1 м. Варламов Василий (Ытык Күөл), 2 м. Максимов Егор (Дэбдиргэ) 3 м. Попов Дмитрий (Дьохсоҕон).

#бүгүн: 1
0
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

16 − семь =