«Улуус олоҕо» бырайыак чэрчитинэн олунньу 2 күнүгэр өрөспүүбүлүкэтээҕи медиа-кииҥҥэ «Саха сирин улуустарыгар медицинскэй өҥөлөр хаачыстыбалара уонна табыгастаах буолуулара» диэн тиэмэҕэ төгүрүк остуол буолан ааста. Кэпсэтиигэ медицинэ тутаах үлэһиттэрэ улуустарга баар сүрүн медицинскэй кыһалҕаларга тохтоотулар уонна ону туоратар туһунан кэпсэттилэр.
Надежда ЕГОРОВА, «Саха сирэ» хаһыат, edersaas.ru
Саха сирэ үрдүк технологияны туһаныыга Илин Уһук регионнарыгар биир инники миэстэҕэ сылдьар. Ол да буоллар, «Нэһилиэнньэҕэ оҥоһуллар медицинскэй көмө хаачыстыба хайдаҕый?», «Кыһалҕалаах киһи барыта үрдүк технологиялаах эмтиир тэриллэр өҥөлөрүнэн туһанар дуо?», «Улуус балыыһалара аныгы технологиянан төһө хааччыллыбыттарый?» уо.д.а. боппуруостар син биир күөрэйэн тахса тураллар.
Суруналыыстар хотугу улуустан кэлбит ыарыһах төһө түргэнник көрдөрүнэр кыахтааҕын, эмп-том тиийиитин, өрөспүүбүлүкэтээҕи балыыһаҕа аһыллыбыт МРТ-нан тыа сирин олохтооҕо төһө туһанарын уо.д.а. боппуруостары интэриэһиргээтилэр. Аһаҕас кэпсэтиигэ СӨ доруобуйа харыстабылын миниистирин солбуйааччы Людмила Вербицкая, Медицина национальнай киинин генеральнай дириэктэрин тэрийэр-методическай үлэҕэ солбуйааччы Ирина Петрова, СӨ Судаарыстыбаннай Мунньаҕын (Ил Түмэн) дьокутаата Алена Атласова, Дьокуускайдааҕы 3 №-дээх балыыһа кылаабынай бырааһа Светлана Давыдова уонна Суһал медицинскэй көмө киинин— Өрөспүүбүлүкэтээҕи 2 №-дээх балыыһа кылаабынай бырааһын солбуйааччы Александр Петров кытыннылар.
«Улуус олоҕо» бырайыак эрэдээктэрэ Полина Николаева улуустартан социальнай ситимнэринэн кэлбит ыйытыктары биэрдэ. Холобур, Ленскэй улууһугар «узкай» исписэлиистэр тиийбэттэр, чэпчэтиилээх эминэн туһанааччылар босхо эмп ылар кэмнэрин олус өр күүтэллэр, Үөһээ Халыма оройуонугар морг дьиэтэ уонна гараастара саахалланар кутталлаах уо.д.а. Үөһээ Дьааҥыга үстэригэр диэри саастаах оҕолор босхо эмтэрин эрэсиэбин күн бүгүҥҥэ диэри ыла иликтэр эбит. Баатаҕайдар былырыын тутуута саҕаламмыт балыыһа саҥа дьиэтэ кириисиһинэн сылтаан, тохтотуллан хаалыа диэн куттаналлар. Хотугу сиргэ олорор инбэлииттэр анал хамыыһыйаҕа бириэмэтигэр киирэр кыаҕа суох буоланнар, хаалан хаалаллар. Онон МСЭК көһө сылдьар хамыыһыйалара кинилэргэ бэйэлэрэ кэлэллэригэр баҕараллар уо.д.а.
Төгүрүк остуолга кыттыбыт экспертэр бу уо.д.а. боппуруостарга эппиэттэрин «Якутия» уонна «Саха сирэ» хаһыаттарга уонна СИА сайтыгар сиһилии ааҕыаххыт.
Надежда ЕГОРОВА, «Саха сирэ» хаһыат, edersaas.ru