Арассыыйаҕа эбии үөрэхтээһин хамсааһына тэриллибитэ 100 сыла. Бу бэлиэ даата чэрчитинэн Дьокуускайга “Эбии үөрэхтээһиҥҥэ саҥаны киллэрии: уопут уонна инники кэскил” диэн эрэгийиэннэр икки ардыларынааҕы III научнай-практическай кэмпириэнсийэ буолан ааста.
Тэрээһиҥҥэ өрөспүүбүлүкэ Үөрэҕин уонна наукатын министиэристибэтин уонна биэдэмэстибэлэрин салайааччылара, исписэлиистэрэ, улуустааҕы эбии үөрэхтээһин тэрилтэлэрин үлэһиттэрэ, федеральнай эспиэртэр, төрөппүттэр, уо.д.а. кытыннылар.
Кэмпириэнсийэ сүрүн сыалынан “Оҕолорго көдьүүстээх эбии үөрэхэтээһин” бырайыагы олоххо киллэриигэ бастыҥ уопуту атастаһыы буолар. Тэрээһин чэрчитинэн сэминээр-мунньах, сиэксийэнэн үлэлэр, панельнай дискуссия, маастар-кылаастар буоллулар, педагогтар маастарыстыбаларын үрдэтиигэ куурустар ыытылыннылар.
Күн бүгүн Саха сиригэр баар 5-18 диэри саастаах 181,5 тыһыынча оҕоттон 136 тыһыынчата (75 %) эбии үөрэхтээһининэн дьарыктанар. 2021 сылга ити сыыппараны 80% тиэрдэр соруктаахтар.
Кэлин улахан болҕомтону тиэхиньиичэскэй хайысхаҕа уураллар. Ол курдук, 2016 сыллаахха Дьокуускайга “Кванториум” арыллыбыта. Сыыйа ити уопутун улуустарга тарҕатар соруктаахтар. Ол курдук, холобура,»Үөрэх» национальнай бырайыак «Хас биирдии оҕо ситиһиитэ» диэн хайысхатынан 2024 сылга Саха сиригэр “Кванториумҥа” итиэннэ тыа сиригэр уонна кыра куораттарга олорор оҕолорго аналлаах 10 мобильнай технопаарканы тэрийэн, 35 тыһ. оҕону хабар былааннаахтар.
Владимир ЕГОРОВ, СӨ үөрэҕин уонна наукатын миниистирин эбээһинэһин толорооччу:
— Эбии үөрэхтээһин оҕону лиичинэс быһыытынан иитии биир көрүҥэ буолар. Инники күөҥҥэ научнай-технологическай хайысха турар. Бу хайысха иитинэн былырыын “Кванториум” оҕо технопааркатын арыйбыппыт. Билигин улуустарга технопааркалары сайыннарар соруктаахпыт. Цифровой үйэҕэ бэлэмнээх, сайдыылаах оҕолору бэлэмниир тиэхиньиичэскэй кииннэр баар буолуохтаахтар. Эбии үөрэхтээһин күүскэ сайдарын туһугар бары министиэристибэлэр, биэдэмистибэлэр, олохтоох дьаһалталар күүспүтүн ууруохтаахпыт.
Мария ПЕТРОВА, “Юные якутяне” ресурснай киин дириэктэрэ:
— Бу кэмпириэнсийэҕэ судаарыстыба эрэ буолбакка, төрөппүттэр, оҕолор ирдэбиллэрин толорорго туох наадатын, хайдах үлэлиэхтээхпит туһунан боппуруоһу кэпсэттибит. Кэнэҕэски профессионаллары бэлэмнээһин бастакы тирэҕин эбии үөрэхтээһин уурар. Судаарыстыбаннай муниципальнай тэрилтэлэр эрэ буолбакка, ИП-лар, ХЭУо, кэммиэрчэскэйэ суох автономнай тэрилтэлэр, үрдүк, орто анал үөрэх кыһалара, уо.д.а. үөрэх өҥөтүн оҥороллор. Билигин үбүлээһини судаарыстыбаттан эрэ буолбакка, атын ньымаларынан булар сорук эмиэ турар. Маныаха оҕо ыраах дуу, чугас дуу олороруттан, дьиэ кэргэнин социальнай таһымыттан тутулуга суох эбии үөрэхтээһининэн босхо туһанарын хааччыйар соруктаахпыт.
Людмила ПОПОВА, “Саха сирэ” хаһыат, edersaas.ru
Хаартыскалар: интэриниэттэн