Уоппуска кэмэ саҕаланаатын кытта, Уһук Илин эрэгийиэнигэр авиабилиэт сыаната тута үрдээтэ. Онно сүрүн төрүөтүнэн уматык сыаната ыараабытын, рейс ахсаана аҕыйаҕын уонна аэропуортар авиакомпаниялартан хомуйар төлөбүрдэрэ үрдээбитин ыйаллар. Бүтэһик аҕыс ый иһигэр авиационнай уматык 30%, аэропуортар сөмөлүөт түһэрин-көтөрүн, тохтобулга турарын хааччыйар төлөбүрдэрэ 20% үрдээтэ.
edersaas.ru
Ил Дархан э.т. Айсен Николаев салгын суолунан айан төлөбүрүн сыаната федеральнай таһымҥа быһаарыллыахтааҕын ыйар. «Бу кыһалҕаны эрэгийиэннэр бэйэлэрин күүстэринэн быһаарар кыахтара суох. Авиационнай уматык уонна аэропуортар төлөбүрдэрин чэпчэтэргэ биир кэлим үлэ бардаҕына биирдэ авиабилиэт сыаната бэрээдэктэниэ», — диэн этэр кини.
Чукотка баһылыга дойду киин куоратыгар, Москваҕа сөмөлүөтүнэн эрэ көтөр эрэгийиэннэргэ 15-17 000 солк. чэпчэтиллибит төлөбүрү киллэриэххэ наадалааҕын туруорсар.
Дойду анараа түгэҕэр, уһук кытыы сытар илиҥҥи эрэгийиэн олохтоохторо хааччаҕа суох айанныылларын туһугар премьер-миниистир Дмитрий Медведев авиабилиэттэн НДС төлөбүрүн соторго этии киллэрдэ. Оччотугар авиабилиэт сыаната 5-10 эрэ бырыһыанынан кыччыаҕа.
Уһук Илин олорор дьон салгынынан айан лаппа чэпчээтэҕинэ биирдэ, сайыҥҥы уоппускаларыгар Хара муора кытылыгар, Крымҥа, Кавказ эмтээх уулаах санаторийдарыгар, Алтайга доруобуйаларын бөҕөргөтүнэ барар кыахтаахтар. Субсидияламмыт билиэт ахсаана аҕыйаҕын таһынан, саастарынан хааччах баар буолан, биэнсийэлээх аҕа саастаах дьон уонна 23 диэри эдэр ыччат эрэ туһанар кыахтаах.
Тэрилтэҕэр айаныҥ төлөбүрүн уйуммат, эбэтэр хас эрэ сууматтан үөһэ тахсары төлөөбөт түгэннэригэр, икки оҕолоох дьиэ кэргэн муораҕа сынньана барарыгар аҥаардас айаннарыгар 200 000 солк. ууран биэриэхтэрин наада. Холобур, бэс ыйын 9 күнүгэр Москваҕа диэри билиэт сыаната биир хайысхаҕа 57 123 солк., төннөр билиэтиҥ 46 173 солк. Маннык сыаналаах билиэтинэн орто да хамнастаах дьон бу сайын соҕуруу сынньана бараллара күчүмэҕэй буолбут. Итиччэ сыаналаах билиэттэн НДС да төлөбүрүн көҕүрэттэххэ, дьиэ кэргэн бүддьүөтүгэр охсуулаах.
Авиакомпаниялар сыллааҕы барыстарын сайын уоппуска кэмигэр оҥорор буоланнар, сыл ахсын баччаларга сыананы үрдэтэллэр. Бизнес сүрүн интэриэһэ – халыҥ харчыны оҥоруу, үтүмэн үбү эргитии эрээри, холобур, Саха сиригэр орто хамнас 62 000 солк. түгэнигэр син ботуччу хамнастаах да киһи уоппускатын харчыта аҥаардас айаныгар эрэ барыыһы. Оттон ис дьиҥэ, нэһилиэнньэ улахан аҥаара ити кумааҕыга отчуоттуур орто хамнастарыттан лаппа кыраны ылар. Оччотугар кини долгуннурар сылаас муораны күөх экраҥҥа эрэ көрөр кыахтанар.
Марианна ТЫРТЫКОВА, «Саха сирэ» хаһыат, edersaas.ru