Саха Өрөспүүбүлүкэтин Ил Дархана Егор Борисов 2017 с. олунньу 6 күнүнээҕи Ыйааҕынан Уол оҕо күнэ баар буолла.
Надежда ЕГОРОВА, «Саха сирэ» хаһыат, edersaas.ru
Дьоһуннаах, доруобай уолаттары иитэн таһаарыы уопсастыбаннай-бэлитиичэскэй суолталааҕын учуоттаан олохтоммут бырааһынньык муус устар иккис өрөбүлүгэр бэлиэтэниэҕэ.
Саха сиригэр Уол оҕо күнүн биллэриини «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиринээҕи отделениетын бэрэссэдээтэлэ Прасковья Борисова көҕүлээтэ.
Дьокуускай куораттааҕы доруобуйа харыстабылын управлениета Уол оҕо күнүн чэрчитинэн, муус устар 3-7 күннэригэр эмтиир тэрилтэлэргэ Аһаҕас аан күннэрин биллэрдэ. Ол эбэтэр, бу күннэргэ уолаттарга анаан лиэксийэлэр, бэсиэдэлэр ыытыллыахтара. Обургу саастаах оҕолор «узкай» идэлээх исписэлиистэргэ доруобуйаларын бэрэбиэркэлэтиэхтэрэ.
Муус устар 5 күнүгэр Медицина Дьокуускай куораттааҕы киинигэр (202 микро-оройуоҥҥа)элбэх оҕолоох уонна олохторугар ыарахаттары көрсүбүт ыаллар уолаттарыгар Аһаҕас аан күннэрэ биллэрилиннилэр.
Муус устар 6 күнүгэр Уу тырааныспарын институтун дьиэтигэр обургу саастаах оҕолор уонна ыччаттар доруобуйаларын көрдөрөллөр.
Муус устар 7 күнүгэр эмиэ институт дьиэтигэр уролог-быраас, психолог сүбэ-ама биэриэхтэрэ.
Обургу саастаах уолаттар быар «А» вируһун утары быһыы ылыахтара.
Дьокуускай куорат 3 №-дээх балыыһатыгар уолаттары ортопед-быраас көрүөҕэ. 2 №-дээх балыыһаҕа эмчиттэр 1999 с. төрүөх уолаттар доруобуйаларын дириҥник чинчийиэхтэрэ.
Ону таһынан, куорат 30, 24 уонна Марха с. 2 нүөмэрдээх оскуолаларын үөрэнээччилэрэ «Скажи наркотикам — НЕТ!» лиэксийэлэргэ кыттыахтара.
Уолаттар 1 №-дээх поликлиникаҕа доруобуйаларын көрдөрөллөрүн сэргэ, чөл олоххо санитарнай лиистэри толоруохтара.
Оҕо куораттааҕы балыыһатыгар «Бэйэҥ доруобуйаҕын бэрэбиэркэлэт» акцияҕа Саха гимназиятын оҕолоро кыттыахтара.
Надежда ЕГОРОВА, «Саха сирэ» хаһыат, edersaas.ru