Уус Алдан улууһун В.В. Алексеев аатынан Мүрүтээҕи уолаттар гимназияларын ахсыс кылааһын үөрэнээччилэригэр быйыл умнуллубат үтүө түгэн тосхойдо. “Гимназист сүрэхтэниитэ” сыллата ыытыллар төрөппүттэр, учууталлар уонна оҕолор күүстэринэн тэриллэр хас биирдии кылаас тыынын, оҕо дьоҕурун, төрөппүт дьулуурун, учуутал сүбэтин көрдөрөр тэрээһин.
edersaas.ru
Гимназияҕа уолаттар 5-с кылаастан саҕалаан үөрэнэллэр, ол эрэн 8-с кылааска тахсан тургутууну ааһан, устудьуоннар курдук сессия туттарар зачет киниискэтин тутан, гимназист үрдүк аатын сүгэр түгэннэрэ дириҥ ис хоһоонноох ыытыллар. Аҕыйах чаас иһигэр уолаттар айылҕа салаатыгар, политехническэй уонна гуманитарнай хайысхаларга, наука араас эйгэлэригэр билиилэрин, ыллаан, үҥкүүлээн, хоһоон ааҕан — култуура бары көрүҥэр дэгиттэр дьоҕурдаахтарын көрдөрдүлэр. Чахчы даҕаны, гимназист диэн бары өттүнэн дэгиттэр киһи буолуохтааҕын дакаастаатылар.
Оҕолор гуманитарнай наукаларга эҕэрдэ тылын сахалыы суруйа охсон нууччалыы, английскайдыы тылбаастаан үс тылынан хомоҕойдук саҥаралларын иһитиннэрдилэр.
Айылҕа наукаларын салаатыгар ханнык баҕарар алдьархайга уолуйбакка, тугу гыныахтаахтарын чопчу этэн киһи олоҕун быыһыырга бэлэмнэрин, тыаҕа кыыл суолун сонордоон булка-алка сыһыаннаахтарын итэҕэттилэр.
Политехническэй хайысхаларга доргуччу алгебра, геометрия сокуоннарын өйдөрүттэн этэн сөхтөрдүлэр. Электрическэй боруобаты өрөмүөннээн компьютеры холбоон, робот массыынаҕа оруобуна 2 миэтэрэҕэ тиийэр гына формуланы суоттаан, уган айаннатан аныгы үйэҕэ сөп түбэһэр дьоҕурдаахтарын итэҕэттилэр.
Салгыы бу оҕолорбут сүүрэн кэлэн, сыанаҕа ойон тахсаат, ырыа ыллаан эҥээритэн, сахалыы үҥкүүгэ битийэн, ийэлэрин кытта вальс үҥкүүлээн эргичийэн бардылар. П.А. Ойуунскай төрөөбүтэ 125 сылыгар аналлаах, кини олоҕун күлүгүнэн көрдөрөр инсценировка туруоран театральнай талааннарын көрдөрдүлэр.
Маны көрө олорон киһи кыаҕа муҥура суоҕун, баҕардахха, ханнык баҕарар баҕа санаа туоларын, биир киһи туохха барытыгар дьоҕурдаах буолуоҕун итэҕэйэҕин. Ити курдук, сылтан сыл ыытыллар “Гимназист сүрэхтэниитэ” тэрээһин тупсан, уолаттар кыахтарын, дьоҕурдарын арыйар, кинилэр тыыннарын, санааларын кынаттыыр үтүө үгэс буолар.
edersaas.ru саайтка анаан Вероника АЛЕКСАНДРОВА.