Дьокуускайга Новопортовской оройуонуттан эдэр ыал оҕолорунуун дьиэлээн истэхтэринэ алабай боруодалаах ыт сыабыттан босхо баран дьоҥҥо саба түспүт.
«Балтараалаах оҕобун көтөҕөн испитим, ыт тута биһиэхэ сүүрэн кэлэн атахпар, илиибэр түһүтэлээбитэ. Оҕобор ыстана сатаабыта. Ол кэмҥэ мастаах икки уол сүүрэн кэлбитигэр алабай аны кинилэргэ ыстаммыта. Кинилэр суохтара буоллар, алдьархай. Махталбыт муҥура суох», — диэн кэпсиир ыал аҕата Максим Васильев. Көмүскэспит 24-тээх Константин Егоровы ыт төбөтүттэн атаҕар диэри бүтүннүү ытырбыт.
«Киэһээ аҕыс диэки хаһыыны-ыһыыны истэн доҕорбунуун Иван Кузьминныын сүүрэн тиийбиппитигэр, ыт миэхэ саба түспүтэ. Табаарыһым маһынан саайталыы сатаабыта даҕаны, туһа суох – олох наадыйабатаҕа, ымыр да гынан ылбат. Бүтэһигэр муннуга саайбытыгар, мас тостубута. Ыт төбөбөр түспүтэ. Хаста даҕаны сиргэ охторо-охторо ытырталаабыта. Онтон өссө биир эр киһи сүүрэн кэлэн пневматическай саанан алабайы кулгаахха ытан дөйүппүтэ. Бу иннинэ киниэхэ эмиэ саба түспүт эбит. Салгыы хаһаайын ытын бэйэтэ кэлэн дьаһайбыт этэ. Миигин реанимацияҕа илдьибиттэрэ. Хаһаайын мин ыаллыы олорор киһим. Куорат киинигэр көспүттэр, ыты хаалларбыттар. Ыйылаа да ыйылаа буолар этэ кыһын. Тоҥон буолуо. Кэлэ-бара аһата сылдьыбыттар. Хаһаайыҥҥа улаханнык кыыһырбаппын эрээри, итинник бөдөҥ ыттары тутарга туспа быраабыта баар буолуохтаах. 80 киилэлээх ыттан улахан эр дьон даҕаны сатаан көмүскэммэт буоллаҕына, оҕолор тустарынан этэ да барыллыбат… Полицияҕа сайабылыанньа суруйбуппут. Борокоротуураҕа ыыппыттар, холуобунай дьыала тэриллэрин быһаарыахтаахтар. Хаһаайын: «Буруйбун билинэбин, эппиэттииргэ бэлэммин. Ыты күн өрүү-өрүү аһатар этим. Сыаба элэйэн быһа барбыт. Аҕыс сыллааҕыта ииттэ ылбыппыт. Урут итинник адьырҕа буолбатах, ыт-ыт курдук этэ», — диир.
Надежда САМСОНОВА.