Өрөспүүбүлүкэ чэпчэки атлетикаҕа дьиэ иһинээҕи чөмпүйэнээтин иккис күнүгэр 60 м мэһэйдээх сүүрүүгэ, 200, 3000, 800 м дистанцияларга сүүрүүлэргэ, 4×200 м эстафетаҕа уонна үстэ төхтүрүйэн ойууга кыайыылаахтар ааттара билиннэ.
Петр Павлов, “Саха сирэ” хаһыат, https://edersaas.ru/
Тустуу күрэхтэһиилэригэр холоотоххо, көрөөччүтэ быдан аҕыйах эбит. Ол оннугар күрэхтэһиини тэрийэн, салайан ыытыы барыта бэрээдэк быһыытынан барара сөхтөрдө. Ханнык дистанциялар ханнык бириэмэҕэ ыытыллаллара барыта чопчуланан, тутуһуллар буолан, күрэхтэһии сып-сап соҕустук ыытыллан түмүктэннэ. Туох даҕаны мөккүөр, балыйсыы эҥин суох.
Чөмпүйэнээккэ сүрүннээн устудьуон оҕолор кытыннылар. Өссө оскуола оҕолоро туспа бөлөҕүнэн киириэхтээхтэрин, тумуу туран, кыттыбатылар. Ол да үрдүнэн кыттааччы элбэх диэххэ сөп. Мин көрдөхпүнэ, саамай уопуттаахтарынан 60 м кыайыылааҕа Михаил Жарин уонна Горнайтан төрүттээх, билигин Мэҥэ Хаҥалас хамаандатыттан кыттар Ирина Осипова буолаллар. Ирина бэҕэһээ 1500 миэтэрэҕэ сүүрүүгэ бастаабыт эбит буоллаҕына, бүгүн 3000 м бастаата. Уопуттаах киһи диэх курдук, дистанция аҥарыгар диэри утарсааччытын “көхсүгэр ыйана сылдьан” баран, уһулу ойон тахсан, иккис буолбут С.Власованы 42 сөкүүндэнэн хаалларда. Маны, сөптөөх тактиканы тутуһан кыайда диэххэ сөп. Ирина спорка бэриниилээҕэ хайҕаныан эрэ сөп.
Ыйыталаһан көрдөххө, бу күрэхтэһии спортсменнарга аны сайын Үөһээ Бүлүүгэ буолар Манчаары спартакиадатыгар бэлэмнэнии бастакы түһүмэҕин курдук сыаналанар эбит.
Иккис күн көрөөччү интэриэһин 4×200 м эстафетаҕа сүүрүү тарта. Кыргыттарга да, уолаттарга даҕаны биэстии хамаанда күрэхтэстэ. Онуоха СӨ үтүөлээх тренерэ Петр Нечаев иитиллээччилэрэ күннээтилэр. Манна даҕатан эттэххэ, үтүөлээх тренер төрөппүт уола Александр үрдүгү ойууга бастакы, дьаадыраны анньыыга уонна 60 м мэһэйдэрдээх сүүрүүгэ иккис көрдөрүүлээх.
Чөмпүйэнээт түмүгүнэн Ирина Осипова, Анна Степанова, Петр Филиппов, Игорь Чугунов, Кай Адамов, Ирина Белик, Егор Быганов уонна Михаил Руфов бастыҥнарынан ааттанан, СӨ физическэй култуураҕа уонна маассабай спорка управлениета олохтообут харчынан сертификаттарын туттулар.
Кыайыылаахтарга наҕараадалары чөмпүйэнээт кылаабынай судьуйата Василий Алексеев, СӨ хамаандатын кылаабынай тренерэ, олимпийскай чөмпүйүөн Мария Пинигина, “Триумф” Спорка бэлэмнэнии киинин дириэктэрин солбуйааччы Михаил Ноговицын туттардылар.
Чөмпүйэнээт иккис күнүн түмүк көрдөрүүлэрэ:
60 м мэһэйдэрдээх сүүрүү: 1. Анастасия Заварухина (Дьокуускай) – 9.55, 2. Елизавета Агафонова (Дьокуускай) – 9.66, 3. Дарья Добрынина (Дьокуускай) – 10.30.
60 м мэһэйдэрдээх сүүрүү: 1. Игорь Чудинов (Дьокуускай) – 8.19, 2. Александр Нечаев (Дьокуускай) – 8.31, 3. Данил Лаврентьев (Дьокуускай) – 8.66.
Үстэ төхтүрүйэн ойуу: 1. Кай Адамов (ХИФУ) – 14.45, 2. Иван Пестряков (Уус Алдан) – 14.10, 3. Ньургун Лавров (Чурапчы) – 14.01.
Үстэ төхтүрүйэн ойуу: 1. Анастасия Заварухина (Дьокуускай) – 11.39, 2. Ольга Трофимова (Дьокуускай) – 11.20, 3. Ксения Матяш (Нерюнгри) – 11.06.
800 м 1. Ирина Белик (ХИФУ) – 2.22,28, 2. Анна Прокопьева (Чурапчы) – 2.25,50, 3. Пелагея Григорьева (Үөһээ Бүлүү) – 2.25,87.
800 м 1. Филипп Собакин (ХИФУ) – 2.01,22, 2. Павел Федоров (Чурапчы) – 2.01,43, 3. Александр Остапов (Ленскэй) – 2.01,97.
200 м 1. Анна Степанова (Сунтаар) – 27.02, 2. Татьяна Зиничева (ЯПК) – 27.69, 3. Екатерина Стрюкова (Чурапчы) – 28.27.
200 м 1. Федор Сотников (Мэҥэ Хаҥалас) – 23.13, 2. Юрий Чирков (Дьокуускай) – 23.44, 3. Николай Руфов (Мэҥэ Хаҥалас) – 23.81.
3000 м 1. Ирина Осипова (Мэҥэ Хаҥалас) – 10.17,52, 2. Сахаайа Власова (Чурапчытааҕы институт) – 10.59,42, 3. Саргылана Флегонтова (Чурапчы) – 11.08,65.
3000 м 1. Егор Быганов (Чурапчы) – 8.48,26, 2. Степан Степанов (Чурапчы) – 8.50,52, 3. Дмитрий Степанов (Чурапчы) – 8.50,61.
4×200 м эстафета (кыргыттар): 1. Дьокуускай – 1.51,40, 2. Чурапчы – 1.54,29, 3. ХИФУ – 1.56,43.
4×200 м эстафета (уолаттар): 1. Дьокуускай – 1.34,78, 2. ХИФУ – 1.34,84, 3. ШВСМ – 1.35,35.
Петр ПАВЛОВ,“Саха сирэ” хаһыат, https://edersaas.ru/
Ааптар хаартыскаҕа түһэриилэрэ.