Уоруйахтар уонна түөкүттэр сиэртибэлэринэн, сүрүннээн, дэбигис итэҕэйимтиэ аҕам саастаах дьон буолар. Ыраас санааларынан туохха баҕарар киирэн биэриэхтэрин сөп. Итинник түбэлтэ элбэх.
Вера МАКАРОВА, «Саха сирэ» хаһыат, https://edersaas.ru/
Ол курдук, Томпо улууһугар 80 саастаах эмээхсиҥҥэ дьиэтигэр Б. диэн киһи, социальнай сулууспа үлэһитэбин, мүөт аҕаллым диэн киирэн кэлбит. Эмээхсин эрэйдээх босхо эмтээх мүөттэнэр киһи буоллум диэн үөрэн, бу киһини докумуонун-тугун бэрэбиэркэлээбэккэ да, дьиэтигэр иһирдьэ киллэрээччи буолбут. Саатар ол кэмҥэ киниттэн ураты дьиэлээхтэрэ суохтар эбит.
Бу киһи ол киирэн, мүөт босхо буолбатаҕын, атыыланарын уонна 9 лиитэрэни уу харчыга биэрэрин эппит. Эмээхсин хап-сабар 15 тыһ. солк. харчыны аҕалан киниэхэ туттаран кэбиспит. Харчыны хантан ылбытын өйдөөн көрбүт уоруйах, эмээхсин туохха эрэ аралдьыйбыт кэмигэр, ол сиртэн 32 тыһ. солк. сойбоппут.
Бу чахчынан холуобунай дьыала тэриллэн, силиэстийэ бара турар кэмигэр, буруйданааччы ити уоруллубут сууманы — 47 тыһ. солк. — эмээхсиҥҥэ төннөрбүт.
Ол эрэн, Б. урут хаста да сууттаммыт киһи буоларынан, суут кинини 2 сыл 6 ыйга кытаанах эрэсиимнээх холуонньаҕа көҥүлүн быһарга уурбут.
Сууттанааччы бу Томпо оройуоннааҕы суутун бириигэбэрин СӨ Үрдүкү суутугар апелляция бэрээдэгинэн ааһыммыт эрээри, Үрдүкү суут уурааҕы оннунан хаалларбыт.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ» хаһыат, https://edersaas.ru/
Хаартыска: интернет.