Сайтпытыгар от ыйын 24 күнүгэр «25 улууска буруйу оҥоруу аҕыйаата» диэн иһитиннэриим бэчээттэммитэ. Онно сыл бастакы аҥаарыгар уоруу аҕыйыы быһыытыйбыт эрээри, хас үһүс буруй уоруу буоларын туһунан эмиэ суруйбутум.
Бу күннэргэ полиция оперативниктара арыйбыт уорууларын ылан көрдөххө, уоруйах маннык мэтириэтэ ойууланан тахсар.
Ол курдук, Дьокуускай куорат биир эрэстэрээнигэр суотабай төлөпүөнү уорбуттар. Полицияҕа эрэстэрээн үлэһитэ эрийбит. Онно эппитинэн, кини төлөпүөнүн үлэлиир сиригэр уурбут.
Полицейскайдар уорбаланааччыны сонно миэстэтигэр туппуттар — 30 саастаах омук киһитэ ити киэһэ эрэстэрээҥҥэ сынньана олорон, «служебное помещение» диэн суруктаах хос аана аһаҕаһын көрөн, онно үөмэн киирэн, остуолга сытар төлөпүөнү ылан тахсыбыт. Уонна тугу да оҥорботох киһи курдук салгыы аһыы-сии олорбут. Оперативниктар туталларыгар, уорбут төлөпүөнэ баар эбит.
Онтон Ленскэйгэ биир дьахтар дьиэтин түннүгүн алдьатан киирэн, тэлэбиисэрин уорбуттар. Уорбаланааччыны эмиэ бэрт түргэнник туппуттар.
Барыллаан быһаарыынан, дьахтары урукку эрэ халаабыт. Арахсан баран, дьахтар эр киһиэхэ докумуоннарын биэрбэккэ эрэйдээбит. Онуоха бу Бурятияттан төрүттээх 44 саастаах киһи ол докумуоннарын дьахтар дьиэтигэр суох кэмигэр ыларга быһаарыммыт.
Ол санаатын толорон, кыбартыыра түннүгүн алдьатан киирэн, докумуоннарын ылбытын таһынан, таарыйа тэлэбиисэри кыбынан тахсыбыт.
Ол эрэн, сокуонунан эр-ойох буолан бүппүттэрин быһыытынан, дьиэҕэ баар барыта дьахтар мала буоларынан, бу киһи дьыалаҕа эриллибит.
Онтон Нам улууһугар 50 саастаах киһиттэн тэлгэһэтигэр турбут 12 тыһ. солк. сыаналаах бэлисипиэтин уорбуттар.
Уорбаланааччы туппуттар — урут алтата сууттана сылдьыбыт (уоруу, күлүгээннээһин, киһини ыараханнык эчэтии иһин) 33 саастаах, ыаллыы олорор киһитэ эбит. Ону бу сүтүктээх киһи бэркэ диэн билэр эрээри, малларын харыстыы соҕус тутар туһунан толкуйдаахтаабатах.
Барыллаан быһаарыынан, рецидивист бэлисипиэти түүн уорбут. Ыалын ыта кинини билэр буолан, үрбэтэх. Уорбут бэлисипиэтин 3 тыһ. солк. батарбыт.
Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.