Сорох түгэннэргэ киһиэхэ көмөлөспүтүҥ бэйэҕэр бөрүкүтэ суоҕунан эргийиэн сөп.
Ол курдук, Дьокуускай куорат полициятыгар 20 саастаах кыыс кини кыбартыыратыттан улахан уоруу тахсыбытын туһунан сайабылыанньа киллэрбит. Уопсайа 100 тыһ. солк. кэриҥэ суумалаах хоромньу тахсыбыт.
Оперативниктар бу уорууга уорбаланааччыны туппуттар — 21 саастаах устудьуонка эбит.
Барыллаан быһаарыынан, бу тутуллубут кыыс эмсэҕэлээччи кыыс кыбартыыратыгар олорор эбит, ол эбэтэр, дьукаах быһыытынан. Биир күн хаһаайка дьиэтигэр суох кэмигэр, уорбаланааччы кини нуорка саҕынньаҕын уонна кыһыл көмүс ытарҕатын уорбут уонна олору ломбарга илдьэн туттарбыт.
Ол туттаран ылбыт 23 тыһ. солк. харчытыттан сороҕун финансовай тэрилтэҕэ взнос быһыытынан укпут, ордугун эрэстэрээҥҥэ бараабыт.
Бу чахчынан «уоруу» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.