Атыылаһымаҥ да, атыылаамаҥ да диэн ис дьыала уорганнара дьону сэрэтэллэр.
Уоруйах оҥорбут буруйун суолун-ииһин кистии охсоору, уорбут малын тутатына батара сатыыр. Онуоха сыаната босхону эрэ үрдүнэн буолан, дьон онно бэйэтэ дэбигис киирэн биэрэр. Чэпчэки сыанаҕа атыылаһар мала-сала туох да докумуона суоҕун билэ-билэ, хантан ылыллыбытын сэрэйэ-сэрэйэ атыылаһар киһи бэйэтэ эппиэккэ тардыллыан сөп.
Ол эппиэтинэс РФ Холуобунай кодексатын 175-с ыстатыйатынан көрүллэр. Ол эбэтэр, буруйу оҥоруу түмүгэр булуллубут малы атыылаһыы уонна батарыы диэн. Накаастабыл миэрэтэ – ыстарааптаан саҕалаан, 2 сылга диэри көҥүлү быһыы. Маныаха уоруллубут мал атыыласпыт киһиттэн былдьаныллар, харчыта төннөрүллүбэт. Эргиччи ночоот буолан тахсар.
Онон, киһиттэн тугу эмит атыылаһаргытыгар, ол мал докумуоннарын көрдүөхтээххит, серийнэй нүөмэрин бэрэбиэркэлиэхтээххит, хантан ылбытын ыйытыахтааххыт. Биитэр, муҥ уһугар, криминал буолбатаҕын туоһулатан, пааспарын дааннайын сурунан, араспыыска ылыахха сөп. Чэпчэки сыанаттан сэрэхэдийиэххэ.
Кэпсии сылдьыма
Маны тэҥэ, бэйэҥ дохуотуҥ, атыыласпыт малларыҥ туһунан дьоҥҥо мээнэ ыһа-тоҕо кэпсии сылдьыа суохтааххын. Олоруҥ бэйэлэрэ да билбэттэринэн, уоруйахтарга суол аһан биэриэхтэрин сөп. Ити туһунан оҕолорго эмиэ этэн, сэрэтэр ордук.
Дьиэҥ таһыгар, подъезкар тэлбиҥнии сылдьар билбэт киһиҥ эн болҕомтоҕун тардыахтаах. Дьүһүнүн, тас көрүҥүн өйдүү сатаа, кимнээххэ кэлбитин ыйытыаххын сөп. Ыалларгын кытары иллээх сыһыаннаах буоллаххына, уорууну сэрэтиигэ ол – үчүгэй ньыма.
Биһиги корр., «Саха сирэ» хаһыат, edersaas.ru
Хаартыска: интэриниэттэн.