Ымсыы санааттан уонна арыгы иһэн баран, дьон арааһы барытын уорар эбит — сүөһүттэн саҕалаан, көмүскэ, ноутбукка, бородууктаҕа тиийэ. Полиция оперативниктара ханнык буруйдары арыйбыттарын билсиэҕиҥ.
Вера МАКАРОВА, «Саха сирэ» хаһыат, edersaas.ru
Федеральнай ирдэбилгэ биллэриллибит, Ленскэйтэн уонна Хаҥаластан төрүттээх урут сууттана сылдьыбыт, хас да уорууга уорбаланааччылары оперативниктар Приморскай кыраайтан туппуттар. Бу бөрөстүүпүнньүктэр өрөспүүбүлүкэттэн ааспыт сыл бүтүүтүгэр куоппуттар. Тэрээһиннээх бөлөҕүнэн оҥорбут буруйдарын иһин накаастаналларыттан куттанан.
Барыллааһын силиэстийэ быһаарбытынан, уорбаланааччылар 2014 сылтан 2015 сылга диэри кэмҥэ Хаҥалас улууһугар сүөһү уоруутунан дьарыктаммыттар. Уорбут сүөһүлэрин өлөртөөн, этин дьоҥҥо атыылаабыттар. Итинэн кинилэр 500 тыһ. тахса суумалаах хоромньуну таһаарбыттар. Бары Силиэстийэлиир изоляторга хаайылыннылар.
Өлүөхүмэҕэ эмиэ урут сууттана сылдьыбыт үс киһи хас да дьиэни халаабыт. 59 саастаах дьахтартан 16 тыһ. солк. сыаналаах суотабай төлөпүөнүн уорбуттар. Ити күн иннинэ уоруйахтартан икки киһитэ киниэхэ ыалдьыттаабыт. Уонна ол төлөпүөнү сойботон тахсыбыттар. 31 саастаах киһи уоруллубут төлөпүөнү билэр дьахтарыгар бэлэхтээбит.
Түүнүгэр аны аттынааҕы дьиэ аанын сүгэнэн алдьатан киирэн, таба этин, балыгы уоран тахсыбыттар. 9.800 солк. хоромньу тахсыбыт.
Салгыы эмиэ аттынааҕы атын дьиэҕэ аанын тоҕо тэбэн киирэн, үрүҥ көмүс оҥоһуктары уонна бородууктаны ылан барбыттар. 10 тыһ. солк. хоромньу тахсыбыт.
Буруй оҥороллоругар үһүөн итирик сылдьыбыттар. Бу уоруулары оперативниктар «сылааһына» арыйбыттар. Инньэ гынан, уорбуттарын атыылыы-батара иликтэринэ тутуллубуттар.
Дьокуускай куоракка ханна да үлэлээбэт, урут сууттана сылдьыбатах 36 саастаах дьахтар бииргэ арыгылаабыт киһитин харчытын уорууга уорбаланан тутуллубут.
Кини билиммитинэн, ити иннинэ ол киһилиин гарааска арыгы испиттэр. Ол олорон, хаһаайын элбэх харчылааҕын туһунан кэпсээччи буолбут. Утуйуо эрэ кэрэх — дьахтар ол 60 тыһ. солк. харчыны сойботон баран, атахха биллэрбит.
Эмиэ киин куоракка тахсыбыт уоруу: Кузьмин уулуссатыгар турар маҕаһыынтан ноутбук уорбуттар. Уорбаланааччы быһыытынан, Бүлүүттэн төрүттээх, урут сууттана сылдьыбатах 29 саастаах кыыс тутуллубут.
Ити маҕаһыыҥҥа атыылааччынан үлэлиир эбит. Онуоха кини иннинэ үлэлээн бүтэн барбыт кыыс ноутбугун умнан хаалларан кэбиспит, ону ылааччы буолбут.
Кэбээйи улууһун Чагда с. биир киһи түүн маҕаһыыны алдьатан киирэн, бородуукта уонна каассаттан харчы уорбут. 5 тыһ. солк. тахса суумалааҕы.
Икки нэдиэлэ буолан баран, уоруйах ити маҕаһыыҥҥа хаттаан киирэн, эмиэ ас уорбут.
Уорбаланааччыны туппуттар — урут сууттана сылдьыбатах 39 саастаах дьахтар. Итирэн баран, ымсыы санааттан уорбутун билиммит.
Бу чахчыларынан холуобунай дьыала тэриллибитин СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интернет.