Уоруулары арыйдылар: соботтон саҕалаан, тэлэбиисэргэ тиийэ

Ааптар: 
Бөлөххө киир:

Дьон арааһы бары уорарыттан киһи да бэркиһиир! Тутуллуохпут суоҕа диэн бэйэлэригэр бүк эрэнэллэрэ оччо эбитэ дуу, биитэр итирдэр утах дьайыыта оччо буоллаҕа дуу? Бу күннэргэ полиция оперативниктара ханнык уоруулары арыйдылар?

edersaas.ru


Электроинструменнары

Хаҥалас улууһугар биир тэрилтэттэн 100 тыһ.солк. тахса суумалаах уоруу тахсыбыт. Бу уорууга уорбаланан, 22 саастаах уонна урут сууттана сылдьыбыт 25 саастаах уолаттар тутуллубуттар.

Барыллаан быһаарыынан, кинилэр бу тэрилтэҕэ урут үлэлии сылдьыбыттар уонна биир кэмҥэ иккиэн тэҥҥэ уурайбыттар. Биир күн арыгылыы олорон, үлэлээбит сирдэриттэн уорарга быһаарыммыттар. Уонна ол түүн тэрилтэлэригэр холкутук киирэн, «отбойнай» өтүйэни, автомойканы, икки электрическэй эрбиини, «болгарканы» ылан тахсыбыттар. Уорбут малларын сороҕун батара охсон, тус наадаларыгар туттубуттар.

20 киилэ собону

Оттон Эбээн Бытантайга биир дьахтар дьиэтин күүлэтиттэн 20 киилэ собону уорбуттар. Уорбаланааччы быһыытынан, 18 саастаах уол тутуллубут.

Ити күн уорбаланааччы доҕотторунаан арыгылаабыттар. Түүн таһырдьа күүлэйдии тахсыбыттар уонна тоҥоннор, иттээрилэр, бастакы түбэһиэх дьиэ аанын тиийэн тоҥсуйбуттар. Ол эрэн, дьиэлээх хаһаайка аанын аспатах.

Ол кэмҥэ бу уол күүлэҕэ кууллаах собону өйдөөн көрбүт уонна уһуннук саарыы барбакка, куулу ылбыт да, дьиэтин диэки дьүгдьүрүйбүт. Сороҕун бэйэтэ астанан аһаабыт, сороҕун аймахтарыгар түҥэппит.

Суотабай төлөпүөннэри

Дьокуускайга эмиэ атастыылар бииргэ аһааһыннарын түмүгэр, 15 тыһ. солк. сыаналаах суотабай төлөпүөн сүппүт.

Эдэр киһи бэйэтин доҕотторун дьиэтигэр ыҥырбыта, анараалара кини билбэт дьонун илдьэ кэлбиттэр. Киэһэни быһа арыгылаан баран, биир киһи барарыгар, дьиэлээх уол төлөпүөнүн ылан тахсыбыт уонна онтун атыылаабыт. Бу 22 саастаах уорбаланааччыны туппуттар.

Онтон Уус Алдаҥҥа биир маҕаһыын атыылааччыта 70 тыһ. солк. сыаналаах суотабай төлөпүөнүттэн ытыс соттубут. Оперативниктар бу уорууга уорбалаан, Хаҥалас улууһуттан төрүттээх, урут түөкүннээһиҥҥэ уонна халааһыҥҥа түбэһэн сууттана сылдьыбыт 42 саастаах киһини туппуттар. Төлөпүөнү кини атыылааччы атыҥҥа аралдьыйбыт кэмигэр сойбоппут.

Мэҥэ Хаҥаласка биир кыыс саататар-аралдьытар заведениеҕа суотабай төлөпүөнүн уордарбыт. Онуоха кини бэйэтин дьалаҕай быһыыта оруолу оонньообут — төлөпүөнүн остуолга уурбут уонна быстах баран кэлиэн икки ардыгар хаарыан мала мэлийбит.

Бу уорууга уорбаланан, Сунтаартан төрүттээх, урут халааһыҥҥа түбэһэн сууттана сылдьыбыт 29 саастаах киһи тутуллубут. Төлөпүөнү хаһаайкатыгар төннөрбүттэр.

Тэлэбиисэри

Эмиэ киин куоракка тахсыбыт уоруу. Бу сырыыга дьиэни куортамнаабыт киһи уорбаланан тутуллубут — Мэҥэ Хаҥаластан төрүттээх 19 саастаах уол.

Уорбаланааччы биир сууккаҕа диэн, дьиэ куортамнаабыт. Онтон сарсыныгар дьиэлээх хаһаайын кэлбитэ — арай 30 тыһ. солк. сыаналаах плазменнай тэлэбиисэрэ онно оҥос. Куортамнаабыт уол ылан барбыт.

Ол уорбутун ломбарга туттаран баран, дойдулаан хаалбыт.

Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0