Соторутааҕыта WhatsApp социальнай ситимҥэ «уот тарыыба үрдүүр үһү!», «талыллыбатах Тарааһап сыананы соруйан үрдэттэ!» диэн сурах-садьык тарҕанна. Өссө киһи итэҕэйиэн курдук, «Якутскэнерго» ПАУо Энергосбытын аатыттан тарҕаппыттар.
Аҕыйах сылтан бэттэх, дьиэ-уот уонна коммунальнай төлөбүрдэр тарыыптара сылга биирдэ – от ыйын 1 күнүттэн олохтонор. Ол аата эбиллии от ыйыгар буолбута. Онон сыл иккис аҥарыттан электроэнергия төлөбүрэ сыл иккис аҥарыттан 7,5% үрдээн, билигин куоракка гаас билиитэлээх дьиэҕэ олорооччулар 1 киловатт чаас иһин 5,47 солк. төлүүллэр. Былырыыҥҥыны кытары тэҥнээтэххэ, тарыып 38 солкуобайынан үрдээбит. Ол аата бэс ыйыгар диэри 1 киловатт чаас иһин 5 солк. 9 харчыны төлүү олорбуппут. Куоракка уонна тыа сиригэр олорор электрическэй билиитэлээх ыаллар 3,83 солкуобайы төлүүллэр. Ааспыт сылга 3 солк. 57 харчы этэ
WhatsApp мессенджерга тарҕаммыт сымыйа сурах туһунан «Якутскэнерго» ПАУо пресс-сулууспатын исписэлииһэ Ксения Павлова маннык этэр:
– Балаҕан ыйын 20 күнүттэн электрическэй уот тарыыба үрдүүрүн туһунан сымыйа сурах тарҕанна. Бу сымыйа иһитиннэрии. Арааһа, быыбар кэнниттэн политтехнологтар энергетическэй хампаанньа уонна кини салайааччытын аатын түһэрэ, холуннара сатаан ыыппыттар быһыылаах. Уот тарыыптарын СӨ Сыана бэлиитикэтин судаарыстыбаннай кэмитиэтэ сылга биирдэ олохтуур. Ол аата сылы быһа, 365 хонугу быһа биир тарыыбынан олоробут. Тарыып туһунан иһитиннэриини «Якутскэнерго» «Тарифы» диэн салаатыгар (http://yakutskenergo.ru/opening_information/reg_goods/electro.php) киирэн көрүөххүтүн сөп. Онон, Саха сирин олохтоохторуттан социальнай ситимнэр нөҥүө кэлэр сурахтарга итэҕэйбиккитигэр ыҥырыа этибит.
Анивера АКИМОВА.