Бу күннэргэ “Якутскэнерго» ПАУо Энергосбытын иниспиэктэрдэрэ уопсайа 5 мөл. солк. суумалаах электричество уотун уоран туһанан олорбут дьону туттулар.
Ааспыт ый бүтүүтэ иниспиэктэрдэр уокка уоран холбонуу 151 түбэлтэтэ тахсыбытын туһунан иһитиннэрдилэр. Хоромньу уопсай суумата – 5 мөл. солкуобай.
Чааһынай секторга уоту сокуоннайа суох туһаныы үгүстүк тахсар. Уо ситимнэригэр быһа холбонуу элбэх. Маннык көҥүлэ суох быһыы-майгы бэлиэтэннэ эрэ, уот тута араарыллар. Ол курдук, өрөспүүбүлүкэ 129 олохтооҕо уокка көҥүлэ суох холбонон олорбута быһаарылынна.
Санатан эттэххэ, уот ситимнэригэр көҥүлэ суох уоран холбонооччулар 10 – 15 тыһ. солк., оттон тэрилтэ салайааччылара 30 – 80 тыһ. солк., юридическэй сирэйдэр 100 – 200 тыһ. солк. ыстарааптаныахтарын сөп.
Анивера Акимова, «Саха сирэ» хаһыат, edersaas.ru