Уоту уоран туһанааччылар ыстарааптаналлар

Бөлөххө киир:

Өрөспүүбүлүкэ үрдүнэн электричество уотун уоран туһаныы үс тыһыынчаттан тахса түгэнэ баара бэлиэтэннэ. Уопсай ааҕыынан, «Якутскэнерго» тэрилтэҕэ 163, 7 мөл. солк. суумалаах хоромньу таҕыста. Мантан  94,7 мөл. солк. төннөрбүттэр.

edersaas.ru

Уоту туох да көҥүлэ суох туһанан олорор юридическай сирэйдэргэ 693 акт оҥоһуллунна. Хоромньу кээмэйэ 117,8 мөл. солк. суумаҕа тэҥнэспит, онтон 54 мөл. солк. былырыын төннөрбүттэр.

Сыл устата буолбут рейдэлэр түмүктэринэн, ордук   Дьокуускай, Мииринэй уонна Ленскэй куоракка баар юридическэй сирэйдэр уоту уоран туһаналлара биллибит. Кинилэр 113,4 мөл. солк. суумалаах хоромньуну таһаарбыттар. Онтон 50,7 мөл. солк. энергохампаанньаҕа төннөрбүттэр.

Маны таһынан 2423 киһи уоту уоран туһанара биллэн, уопсайа 45,9 мөл. солк. суумаҕа акт оҥоһулунна. Онтон иниспиэктэрдэр үлэлэрин түмүгэр 40,5 мөл. солк. төннөрдүлэр.

Харчыларын харыстаан,  уокка уоран холбонор дьон хампаанньаҕа эрэ буолбакка, туох баар олохтоохторго барыларыгар куһаҕаны оҥороллор. Кинилэр сокуоннайа суох дьайыыларын түмүгэр, уот кыамтата уларыйан, электрическай тэриллэр алдьанар кутталлаахтар, онтон сылтаан баһаар барыан, эчэйии да тахсыан сөп.

Уоту уоран туһаныы сокуонунан бобуллар. Буруйдаахтар уоруллубут киловатт хас биирдии солкуобайын хампаанньаҕа төннөрүөхтээхтэр, ону толорбот буоллахтарына, административнай эппиэтинэскэ тардыллан ыстарааптаныахтарын сөп.

Өскөтүн ким эрэ уоту уоран туһана олорорун көрдөххүтүнэ, «Якутскэнерго» 49-70-00 нүөмэригэр, Энергосбыт контакт-киинин 8-800-100-2205, 498-498 нүөмэрдэригэр эбэтэр Энергосбыт учаастактарыгар эрийэн этиҥ диэн энергетиктэр сүбэлииллэр.

Саргылана Савватеева, edersaas.ru сайтка анаан

+1
0
+1
0
+1
0
+1
0
+1
0
+1
0
+1
0