Уоту-ууну ортотунан былааннаах от чиэппэрэ кэбиһилиннэ

Бөлөххө киир:

Өрөспүүбүлүкэҕэ оттооһун хаамыыта тэтимин дьэ ылан эрэр. Туһааннаах министиэристибэҕэ нэдиэлэ саҕаланыытыгар уонна ортотугар түмүллэр сыыппараларга сигэннэххэ, 17-тэн 25 бырыһыаҥҥа биирдэ дагдас гына түстэ. Онон быйылгы былааннаах оттон чиэппэрэ кээрэтилиннэ.

 edersaas.ru


Соһуйуох дуу, үөрүөх дуу иһин, от хампаанньата саҕаланыаҕыттан бастаан иһэр Кэбээйи улууһун (46%) кэнниттэн сайыны быһа уонна күн бүгүҥҥэ диэри умайа олорор ойуурдаах Бүлүү отчуттара былааннарын 33 бырыһыанын толорон, ол эбэтэр 9 тыһ. туонна оттонон, иккис көрдөрүүлээхтэр. Өрүү буоларын курдук, тыа хаһаайыстыбалаах улуустартан саамай улаханнара – Мэҥэ Хаҥалас былаана даҕаны баһырхай: 43246 туонна оту бэлэмниэхтээҕиттэн 32 бырыһыанын (14042 т оту) кэбистэ.

Үгүөрү былааннаах улуустартан бу күҥҥэ Үөһээ Бүлүү — 29, Амма, Чурапчы, Хаҥалас, Уус Алдан 26-лыы, Нам — 25, Ньурба уонна Сунтаар 23-түү бырыһыаннарын көҕүрэттилэр. Саамай уустук балаһыанньаҕа үлэлиир-хамныыр Орто Халыма отчуттара 3 күн иһигэр кэбиһиилэрин икки бүк (520 туоннаҕа 536 туоннаны) эбэннэр, 18 бырыһыаҥҥа тиэрдэ охсубуттара, бүлүүлэри кытта сыһыаран эттэххэ, тыа сирин үлэһит дьоно уоттан да, ууттан да чаҕыйбаттарын көрдөрөр.

Василий НИКИФОРОВ,  “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0