Бүтэһик биэс сылга кэрэ аҥардар кыһынҥы таҥаспытыгар сахалыы моһуоннаах соннору, бэргэһэлэри, үтүлүктэри тиктэрэн кэтэр буоллубут. Бэҕэһээ ураты сахалыы бэргэһэлээх уонна оһуордаах үтүлүктээх уолу көрдүм. Эрдэ көрбөтөх буолан олус соһуйдум, хайгыы көрдүм уонна аныгы киһи сиэринэн, Инстаграмҥа угуом диэн кытыыттан хаартыскаҕа түһэрдим. Син балай да батыһан хаамтым, ситтэхпинэ сатанар диэн ситтим, «Баһаалыста хаартыскаҕа түһэрэбин дуо?» диэн ыйыттым уол тута сөбүлэстэ уонна «Элбэх дьон түһэрэбит дуо диэн ыйыталлар» диэн хоруйдаата «Ол эрэн интэриниэткэ угума диэтэ». Ол кэннэ аргыстаһан хайдах, хаһан уонна тоҕо маннык сахалыы моһуоннаах бэргэһэ уонна үтүлүк кэппитин кэпсэтэ истибит. Түмүккэ кылгас ыстатыйа суруйарбар көҥүл ыллым. Кэпсэтиибитин ааҕааччылардыын үллэстиэм.
Бу дьикти бэргэһэллэх уол Намтан төрүттээх Максим Попов эбит. Кини СГТХА бастакы кууруһун устудьуона.
— Уолга ураты бэргэһэлээххин. Тоҕо маннык бэргэһэ тиктэрэргэ сананныҥ уонна хаһаанҥыттан кэтэҕиний?
— Олоҥхону, норуотум устуоруйатын, таҥаһын-сабын интэриэһиргиибин. Икки сыл устата сахалыы моһуоннаах бэргэһэни ыраламмытым. Онтубун быйыл олоххо киллэрдим. Быйылгы кыһыны кыстаатым. Олус сылаас, киһи тоҥмот. Бэргэһэбин иистэнньэнҥэ сакаастаан тиктэрбитим. Үтүлүкпүн бэргэһэбэр дьүөрэлээн атыыласпытым.
— Бэргэһэҕин дьон соһуйа көрөр буолуохтаах. Хайдах ылыналларый? Бастаан кэтэргэр кыбыстыбытыҥ дуо?
— Маннык бэргэһэлээх икки эр киһини көрбүтүм. Кыбыстыбатаҕым, чахчы соһуйа көрөллөр, сэргээччи да баар, «дьикти баҕайы бэргэһэлээххин» диир дьоннор эмиэ бааллар. Дьоннор эн курдук кэлэн хаартыскаҕа түһэрээччилэр, «селфилааччыылар».
Ити курдук Максимы кытары сэһэргэстибит. Биир бэйэм олус сэргии көрдүм уонна бу курдук сахалыы моһуоннаах бэргэһэни, үтүлүгү эр дьоннор кэтэллэрэ буоллар дии санаатым.
Анастасия АЛЕКСЕЕВА, edersaas.ru