Сэтинньи 27 күнүгэр Сергей Зверев-Кыыл Уола аатынан Саха үҥкүүтүн тыйаатыра Олоҥхо декадатыгар «Уруйдан, Улуукан Олоҥхо» дьоро киэһэни тэрийдэ.
Ансаамбыл сүрүн солиһа, РФ уонна СӨ үтүөлээх артыыһа Дмитрий Артемьев олоҥхо киэһэтин алгыһынан арыйда. Сыанаҕа дьоро киэһэ кыттыылаахтара бары тахсыбыттарын ытыс тыаһынан көрүстүлэр.
Бастакы түһүмэххэ былырыын баччаларга Москваҕа, Санкт-Петербурга үс үбүлүөйдээх даатаны көрсө ситиһиилээхтик туруоруллубут «Куллустай «Бэргэн» этно-балеттан быһа тардыыны оонньоотулар. Сергей Зверев олоҥхотунан, Санкт-Петербург композитора Игорь Воробьев музыкатынан, Юрий Федоров хореографиятынан туруоруллубут этно-балет Саха национальнай оркестрынан доҕуһуолланан, бүгүҥҥү туруоруу өссө күүһүрдүллэн, көрөөччүгэ тириэртэ.
Иккис түһүмэххэ норуот талааннаахтара: олоҥхоһуттар, тойуксуттар, ырыаһыттар, ону сэргэ улуустартан кэлбит араас бөлөхтөр олоҥхолортон быһа тардыылары көрдөрдүлэр. Кинилэр ортолоругар А.Кулаковскай аатынан Норуот айымньытын дьиэтин үс кэлэктиибэ: «Олонхо» устуудьуйа (сал. С. Лукина), «Тойук» норуодунай этно-фольклор ансаамбыла (Г.Фёдорова, А.Потапов), «Махтал» үҥкүү ансаамбыла (Е.Новикова), В.Каратаев аатынан Олоҥхо кэлэктиибэ (Бүлүү), «Айтал» саха таҥаһын бөлөҕө (Покровскай к.) уо.д.а. бааллар.
Биллиилээх олоҥхоһуттар Семен Черноградскай, Николай Григорьев, тойуксут Сусанна Лазарева уо.д.а. куоластара бүгүн, Олоҥхо күнүгэр, хаһааҥҥытааҕар да чөллөрүйэн, тупсан иһилиннэ.
Филологическай наука кандидата, доцент, Олоҥхо тыйаатырын сүрүн научнай үлэһитэ Агафья Захарова олоҥхону тарҕатарга тиһигин быспакка үлэлэһэр, тирэх буолар норуот талааннаахтара кэлбиттэригэр махтанна. Кини биир үөрүүлээх сонуну иһитиннэрдэ. Ол курдук, ЮНЕСКО Саха сирэ Олоҥхоҕо ыытар үлэтин үөрүйэҕин 86 дойдуга тарҕатарга быһаарыы ылбыт. Онон, быйылгы Олоҥхо Ыһыаҕар ЮНЕСКО бэрэстэбиитэллэрэ кэлэллэрэ күүтүллэр.
Саха үҥкүүтүн тыйаатырын дириэктэрэ, уус-уран салайааччыта, СӨ култууратын үтүөлээх үлэһитэ Александр Алексеев тыйаатыр саха эпоһын өрөспүүбүлүкэ улуустарыгар эрэ буолбакка, Арассыыйа араас куораттарыгар уонна тас дойдуларыгар киэҥник сырдатарын, көрөөччүлэр биһирэбиллэрин ылыан ыларын бэлиэтээн туран, артыыстарга махтанна. Кинилэргэ махтал суруктары уонна А.Зверев үбүлүөйүгэр тахсыбыт кинигэлэри бэлэхтээтэ.
Көрөөччүлэр уонна кыттааччылар биир күн биир сценаҕа бачча элбэх талааннаах дьону түмэн, умнуллубат бэлэҕи ууммуттарыгар бырайыак ааптардарыгар, дьүһүйүүнү иилээн-саҕалаан ыыппыт Светлана Лукинаҕа, уус-уран салайааччы Светлана Бессоноваҕа, Үҥкүү тыйаатырын кэлэктиибигэр махтаннылар.
Түмүккэ сыанаҕа бары илии илиилэриттэн тутуһан, оһуохайы оройуттан туттулар.
Надежда ЕГОРОВА