Саха сиригэр Урутаан сайдар сирдэри тэрийии төһө инникилээҕин туһунан сэтинньи 2 күнүгэр өрөспүүбүлүкэтээҕи медиа-кииҥҥэ, төгүрүк остуолга дьүүллэстилэр. Бырабыыталыстыба бэрэссэдээтэлэ Владимир Солодов «Кангаласс» индустриальнай паарка үтүө холобуру көрдөрбүтүн бэлиэтээтэ.
edersaas.ru
«Манна орто уонна дьоҕус урбаан бэрэстэбиитэллэрэ мустан, оҥорон таһаарыыны биир сиргэ сайыннаран, ороскуоттарын аччатан, судаарыстыбаттан көмө, сүбэ ылан, атахтарыгар турар кыахтаналлар. Иккис урутаан сайдар сир «Соҕурууҥҥу Саха сирэ» сүрүн резиденэ — таас чоҕу хостуур «Колмар» хампаанньа. Бырамыысыланнаска элбэх үп-харчы кутуллан, фабрикалар түргэнник тутуллан үлэҕэ киирдилэр, үтүмэн үлэ миэстэтэ таҕыста, нолуок даҕаны кэмигэр төлөнөн иһэр.
Инникитин «Кангаласс» индустриальнай паарканы кэҥэтэн, Жатайдааҕы суудуналары тутар уонна өрөмүөннүүр сири саҥардан биэрэн, ол бырайыагын киллэрэр санаалаахпыт. Саҥа оҥорон таһаарыы баар сиригэр үрдүкү технологиялары туһанан, бородууксуйаны таҥастааһыны тупсаран, Урутаан сайдар сирдэри элбэтэн иһиэхпит», — диэн эттэ кини.
СӨ экономикатын миниистирэ Майя Данилова, Уһук Илин 18 Урутаан сайдар сиргэ 348 резидени кытта сөбүлэһии түһэрсиллибитин, онуоха 2 трлн 300 млрд солк үп кутулларын, 54 тыһ. үлэ миэстэтэ тэриллэрин иһитиннэрдэ. Итинтэн резиденнэр 8%, үлэ миэстэтин тэриллиитин 33%, үп кээмэйин 9,2% Сахабыт сиригэр тиксэр.
Марианна ТЫРТЫКОВА, «Саха сирэ» хаһыат, edersaas.ru