Уруулга арыгы иһэн баран олоруу иһин эппиэтинэс кытааппытын тимир көлөлөөхтөр бэркэ диэн билэллэр эрээри, итинник суол быһылааннара син биир сыл аайы тахса тураллар.
Вера МАКАРОВА, «Саха сирэ» хаһыат, https://edersaas.ru/
УГИБДД пропагандаҕа отдела биһиэхэ анаан иһитиннэрбитинэн, ааспыт 2016 сылга итирик туруктаах сылдьан айаннааһын түмүгэр, 115 суол быһылаана тахсыбыт (2015 с. — 139). Онно 30 киһи суорума суолламмыт (2015 с. — 44), 144 киһи эт-хаан эчэйиитин ылбыт (2015 с. — 210).
Көстөрүн курдук, итирдэр утаҕы ыймахтаан баран, саахалы таһаарыы биллэрдик аччаабыт. Манна арыгылааһыны утары охсуһуу, кэккэ улуустарга арыгы атыытын тохтотуу, иитэр-өйдөтөр үлэ, дьон сыһыана, сокуон кытаатыыта о.д.а үлэлэр барыта көмөлөһөллөр.
Ол курдук, ааспыт сыл устатыгар уруулга итирик туруктаах айаннаан, 8495 киһи эппиэтинэскэ тардылынна (2015 с. – 9507), ол иһигэр, 1000-тан тахса киһи сыл иһигэр иккистээн түбэһэн холуобунай дьыалаҕа эрилиннэ.
Санатан эттэххэ, 2015 сыл от ыйын 1 күнүттэн арыгы иһэн баран уруулга олорон, медицинскэй бэрэбиэркэни ааһартан аккаастаммыт, эбэтэр итирик туруктаах сылдьан суол быһылаанын таһаарбыт киһи иккистээн түбэһэр түгэнигэр, РФ Холуобунай кодексатын 264.1-с ыстатыйатынан холуобунай дьыала тэриллэр буолбута.
Манна даҕатан эттэххэ, өскөтүн киһи холуобунай дьыалаҕа эриллибит буоллаҕына, чуолаан эдэр киһи, олоҕун устата араас мэһэйдэри көрсөр. Холобура, үлэҕэ ылыыттан саҕалаан, докумуон оҥорторуутугар, атын дойдуга тахсыыга тиийэ, уо.д.а. олох араас эйгэтигэр хааччахтанар.
Ырытыы көрдөрбүтүнэн, сыччах суол быһылааныгар итирик дьонтон сылтаан, 2006 сылтан 2016 сылга диэри кэмҥэ 300-кэ киһини тыына быстыбыт!
Вера МАКАРОВА, «Саха сирэ» хаһыат,https://edersaas.ru/
Хаартыска: интернеттэн.