Биллэрин курдук, уруулга арыгы иһэн баран олорбут суоппардар 2015 сыл от ыйын 1 күнүгэр диэри административнай эрэ эппиэккэ тардыллар этилэр. Ол эрэн, ити күнтэн саҕалаан, РФ Холуобунай кодексатыгар 264.1-с ыстатыйа эбиллибитэ. Бу ыстатыйаҕа олоҕуран, урукку өттүгэр уруулга итирик олорон административнай эпиэккэ тардылла сылдьыбыт киһи хаттаан оннук туруктаах түбэстэҕинэ, холуобунай эппиэтинэскэ тардыллар.
Вера МАКАРОВА, «Саха сирэ» хаһыат, edersaas.ru
СӨ Борокуратууратын пресс-сулууспата иһитиннэрбитинэн, Дьокуускай куорат мировой судьуйата Р. диэн киһиэхэ бириигэбэр таһаарда.
Суут быһаарбытынан, бу киһиэхэ 2016 сыл бэс ыйыгар РФ Холуобунай кодексатын 264.1-с ыстатыйатынан холуобунай дьыала тэриллибитин кэнниттэн, ону хоҥоруутугар хоҥнорбокко, эмиэ соннук уруулга итирик олорон, хаттаан ити сокуону кэспит.
Силиэстийэ бара турар кэмигэр өссө икки итинник буруйу оҥорбут.
Сууттанааччы буруйун толору билинэн, кини хадатаайыстыбатынан дьыалата ураты бэрээдэгинэн көрүллүбүт.
Суут мунньаҕар ити буруйдара дакаастанан, суут кинини 1 сыл 6 ый 15 күҥҥэ уопсай эрэсиимнээх холуонньаҕа көҥүлүн быһарга уурбут. Уонна 3 сыл устатыгар уруулга олорор быраабын быспыт.
Бириигэбэр сокуоннай күүһүгэр киирэ илик.
Холуобунай кодекс 264.1-с ыстатыйатын накаастабыл миэрэлэрэ:
200 тыһ. солк. — 300 тыһ. солк. диэри суумалаах ыстараап, 480 чааска диэри булгуччулаах босхо үлэлээһин, 2 сылга диэри көҥүлү быһыы. Итини таһынан, эбиитин 3 сылга диэри болдьоххо массыына ыытар бырааба быһыллар.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.