Хотугулуу-Илиҥҥи федеральнай университекка “Арктика. Сделано в России” диэн ааттаах норуоттар икки ардыларынааҕы ыччат үөрэххэ үһүс форумугар кастинг буолан ааста. Манна тустаах университет 60-тан тахса устудьуона уонна эдэр учуонайа кытынна. Бу туһунан ХИФУ пресс-сулууспата иһитиннэрэр.
Людмила Попова, “Саха сирэ”, https://edersaas.ru/
“Арктика. Сделано в России” форум — “Арктика — территория диалога” диэн норуоттар икки ардыларынааҕы форум ыччакка аналлаах былаһаакката.
Сүүмэрдиир хамыыһыйа бэрэссэдээтэлэ, ыччат форумун бырагыраамаҕа дириэктэрэ Анна Аперян:
Сүүмэрдиир хамыыһыйа бэрэссэдээтэлэ Анна Аперян
— Форумҥа кыттааччылар билиилэрэ-көрүүлэрэ хаачыстыбалаах буолара ирдэнэр. Онон манна кыттааччыларга ирдэбил эмиэ үрдүк. Мин дойду араас муннуктарыгар форумҥа сүүмэрдиир түһүмэҕи ыытабын. Устудьуоннарга, эдэр исписэлиистэргэ регионнарын сайыннарыы кинилэр сүрүн сыаллара буолар. Бэлэмнэрин таһыма үрдүк уонна билиилэрэ киэҥ. Бүүс бүтүннүү үлэҕэ ылсар санаалаах аспираннар, магистраннар кэлэллэрэ үөрдэр. Кинилэр Арктика тирэх зоналарын сайыннарыы боппуруоһугар чахчы интэриэстээхтэр.
Сүүмэрдиир хамыыһыйа чилиэнэ, СӨ ыччат дьыалаларыгар уонна дьиэ кэргэн бэлиитикэтигэр миниистирин бастакы солбуйааччы Василина Лукина:
СӨ ыччат дьыалаларын уонна дьиэ кэргэн политикатын миниистирин бастакы солбуйааччы Василина Лукина
— Сүүмэрдээһин маннык форматынан өрөспүүбүлүкэҕэ аан маҥнайгытын барар. Бу иннинэ кыттааччылар сайаапкаларын сайт нөҥүө бэйэлэрэ биэрэллэрэ. Сэһэргэһиигэ Арктиканы интэриэһиргиир ким баҕалаах барыта кыттыан сөп. Ити курдук улахан форумҥа биһиги устудьуоннарбыт уонна эдэр учуонайдарбыт кастины ааһыахтара уонна өрөспүүбүлүкэлэрин дьоһуннаахтык көрдөрүөхтэрэ диэн эрэнэбин.
Олунньу 10 күнүгэр диэри Россия куораттарынан форум сирэй сүүмэрдиир түһүмэхтэрэ ыытыллыахтара. Тэрийээччилэр, ким кыттара олунньу ортотугар биллиэ диэн этэллэр.
Людмила Попова, “Саха сирэ”, https://edersaas.ru/