Хотугулуу-Илиҥҥи федеральнай университекка үрдүк үөрэх кыһатын бүтэрээччилэр улуус баһылыктарын кытта көрсүһүүлэрэ тэриллибитэ быйыл иккис сыла.
Елена ПОТОЦКАЯ “Саха сирэ”, edersaas.ru
Үгэскэ кубулуйан эрэр тэрээһин ис хоһоонун университет проректора Константин Кривошапкин быһаарбытынан, тыа сирин исписэлиистэринэн хааччыйар соруктаах хас да түһүмэҕинэн барар үлэ чэрчитинэн проректордар хас биирдии улууска куратор быһыытынан арахсан, устудьуоннар университекка киириэхтэриттэн бүтэриэхтэригэр диэри бииргэ үлэлэһэллэр.
Выпускниктары кытта көрсүһүү бастакы түһүмэҕэ – улуус баһылыктарыныын көрсүһүү. Быйылгы тэрээһини Өймөкөөн уонна Булуҥ улуустарын баһылыктара саҕалаатылар. Өймөкөөн улууһун баһылыга Михаил Захаров бэлиэтээбитинэн, бырамыысыланнастаах улууска, сүрүннээн, оробуочай идэлээхтэр тиийбэттэр. Оскуолаларга педагогтар, улуус киинин балыыһатыгар лор, офтальмолог, эндокринолог быраастар наадалар.
Көрсүһүүгэ кэлбит Өймөкөөнтөн төрүттээх выпускниктар, сүрүннээн, үлэлии-үлэлии үөрэнэллэр эбит. Онон тэрилтэлэригэр бэйэлэрин көрдөрөн, үлэ миэстэтин эрдэттэн булуммуттар. Ол эрээри тыа сиригэр эдэр исписэлиистэргэ улахан болҕомто уурулларын, кэлиҥҥи сылларга кинилэргэ анаан олорор дьиэлэри тутуу тэтимирбитин истэ-билэ сылдьан, төрөөбүт түөлбэлэригэр төннүөхтэрин баҕаралларын үгүс ыччат бэлиэтээтэ. Бу маннык көрсүһүүлэр, биллэн турар, ыччаты тыаҕа олохсутууга көдьүүстээхтэрэ чахчы.
Елена ПОТОЦКАЯ “Саха сирэ”, edersaas.ru