Култуура уонна искусство колледжыгар ыытыллыбыт риторика өрөспүүбүлүкэтээҕи IХ олимпиадата Ыччат сылыгар ананна.
Надежда ЕГОРОВА, «Саха сирэ» хаһыат, edersaas.ru
Олимпиаданы бу колледж дириэктэрэ, СӨ култуура туйгуна, өрөспүүбүлүкэ профессиональнай үөрэхтээһинин туйгуна Захар Никитин арыйда.
Күрэхтэһиилэр быыстарыгар култуура колледжын устудьуоннара литэрэтиирэҕэ аналлаах композиция туруордулар.
«Мин бу олимпиадаҕа сылдьан олус астынным. «Саҥа кэм. Саҥа өйдөбүл. Саҥа санаа» диэн, тиэмэтэ төһө да ыараханын иһин, ыччаттар, этэргэ дылы, хаардыы хаамтылар. Хас биирдии эдэр кыттааччы санааны этэргэ саҥаттан саҥа ньыманы боруобалаата. Бырамыысыланнас, тутуу, коммунальнай хаһаайыстыба, тыа хаһаайыстыбатын, култуура, үөрэхтээһин, доруобуйа харыстабылын эйгэтигэр исписэлииһинэн үлэлиэхтээх ыччаттар тылга эппиэтинэстээхтик, ытыктабыллаахтык сыһыаннаһалларын итэҕэйдим. Олимпиада кыттааччыларын маастарыстыбалара сылтан сыл аайы тупсан иһэр», – диэн олимпиаданы сыл аайы сэҥээрэн көрөр-истэр Зоя Игнатьева астына бэлиэтээтэ.
Түмүккэ Гран-при хаһаайынынан Дьокуускайдааҕы тыа хаһаайыстыбатын техникумун бастакы кууруһун устудьуона Яков Григорьев буолла.
I истиэпэннээх диплому хайа-геология техникумун иккис кууруһун устудьуона Гурий Решетников ылла. II истиэпэннээҕи – үп-экономика колледжын устудьуона Майя Григорьева, III истиэпэннээҕи — Дьокуускайдааҕы медицина колледжын устудьуона Евгений Васильев ыллылар.
Ону сэргэ, кэккэ номинациялар кыайыылаахтарынан:
«Дьон-сэргэ болҕомтотун тардыы» – Вячеслав Жирков (Дьокуускайдааҕы тыа хаһаайыстыбатын техникума), «Артистизм» – Мадина Искандарова (Култуура уонна искусство колледжа), «Тыл кэрэтэ» – Анна Охлопкова (С.Ф.Гоголев аатынан Дьокуускайдааҕы педагогическай колледж), «Санаа уратыта» – Валерия Охлопкова (Дьокуускайдааҕы коммунальнай-тутуу техникума) ааттаннылар.
Надежда ЕГОРОВА, «Саха сирэ» хаһыат, edersaas.ru