“Кириһиэнньэ Таҥара кэмигэр ылыллар уу барыта сибэтиэй буолар дуо?” диэн СИА ыйытыытыгар, Дьокуускай уонна Ленскэй епархиятын пресс-сэкирэтээрэ хоруйдаата. Инокиня Евгенияны кытта суруналыыс Николай Борисов “Акцент” биэриигэ кэпсэттэ.
— Кириһиэнньэ түүнүгэр уу барыта ыраастанан сибэтиэй буолар дуо?
— Храмҥа уонна уу ылар сиргэ сибэтии гыныллыбыт уу эрэ сибэтиэй уунан ааҕыллар. Ититэр ситимтэн ылыллыбыт уу хайдах да сибэтиэй буолар кыаҕа суох. Ол эрээри итинник ньыманан ылыллыбыт ууну Таҥара дьиэтигэр тиийэн сибэтии гыныахха сөп.
— Сибэтии гыныллыбыт ууну ыраастыахха сөп дуо?
— Храмтан ылыллыбыт уу ыраастаммат. Купельтан ылыллыбыт ууну сибэтии гыннахха, химическэй састааба уларыйбат. Кириһиэнньэ түүнүгэр ылыллыбыт ууну буорту буолбат дииллэр гынан баран, аньыылаах-харалаах киһи тутуннаҕына, уу киртийиэн, буорту буолуон сөп.
— Былырыыҥҥы сибэтиэй уу ордубут буоллаҕына, хайыыбытый?
— Кириһиэнньэ түүн сибэтии гыныллыбыт ууну канализацияҕа тоҕуу — аньыы. Былырыыҥҥы ордубут ууну сибэккигитигэр кутуҥ. Сибэтиэй ууну аччык искэ малыыппа ааҕан баран иһиллэр. Ыраастаммыт уунан олорор дьиэни уонна үлэ миэстэтин ыраастыыр ордук.
Сибиэтиэй ууга сөтүөлээн, аньыыттан-хараттан босхоломмоккун. Христианствоҕа “аптаах палочканан” олох уустуктарын биирдэ алы гынан суох гыммаккын. Ис туруккун, эккин-сииҥҥин, санааҕын уларытан эрэ баран ыраастанаҕын. Сибэтиэй ууга сөтүө – үтүө өрүт саҕыллар түгэнэ. Биллэн турар, муустаах ууга умсан ылыыга ылбычча киһи санаммат. Ол эрээри бу киһи бэйэтин бэйэтэ кыайыыта кини доруобуйатын бөҕөргөтөрө чахчы. Син эмиэ Таҥара үлэһитигэр кэлэн бэйэҥ оҥорбут аньыыгын-хараҕын кэпсээн ыраастаныыга тэҥнээх. Ол кэнниттэн олоҕу саҥалыы көрөргүттэн Таҥара, биллэн турар, үөрэр.
СИА-тан Елена ПОТОЦКАЯ тылбааһа, https://edersaas.ru/