Оҕо оскуолаттан иллэҥ кэмигэр дьарыктаах буоллаҕына эбии сайдар, билиитэ-көрүүтэ дириҥиир. Быйылгы сылы Уус Алдан улууһугар Оҕо аймах сылынан биллэрэн, кэнчээри ыччат талаанын арыйарыгар, дьоҕурун туһанарыгар, ситиһиилэнэригэр, олоҕу сыаналыырыгар үгүс болҕомто ууруллар. “Сахамедиа” суруналыыстара “Улуус олоҕо” бырайыак чэрчитинэн Бороҕоннооҕу оҕону эбии үөрэхтээһин киинигэр сырыттыбыт.
Уус Алдан улууһугар уопсайа алта анал киин үлэлиир: өрөспүүбүлүкэтээҕи спорт оскуолата, улуустааҕы спорт оскуолата, муусука оскуолата, эдэр натуралистар станциялара, тиэхиньикэнэн айар үлэ киинэ уонна оҕону эбии үөрэхтээһин киинэ.
Оҕону эбии үөрэхтээһин киинигэр араас көрүҥнэринэн куруһуоктар үлэлииллэрин таһынан, киинэ тыйаатыра уонна быстах кэмҥэ көрүүтэ-истиитэ суох хаалбыт оҕолор куруһуоктара баар.
Киинэ тыйаатырын туһунан ситэрэн суруйар буоллахха, кылгас кэм иһигэр нэһилиэнньэ номнуо киинэҕэ сылдьарын сөбүлээбит, саала иһэ куруук көрөөччүнэн толору. Былырыын Арассыыйа үрдүнэн Киинэ сыла биллэриллибитэ. Онон сибээстээн 100 тыһыынчаттан кыра нэһилиэнньэлээх тыа сирдэригэр киинэ тыйаатырын оҥорууга 5 мөлүйүөн солкуобайдаах грант оонньоммута. Бу манна хапсан, Уус Алдан улууһа тыа сирин култууратын сайыннарыыга үтүө дьыаланы тэрийбитэ хайҕаллаах.
Аны быйылгыттан үлэ бырагырааматын кэҥэтэн, манна улахан дьоҥҥо эмиэ араас куруһуоктары, маастар-кылаастары тэрийэр буолбуттар. Ол курдук, баҕалаахтар кэлэн үтүлүк, сон, бэргэһэ тигэргэ, уруһуйдуурга үөрэнэллэр, уопут атастаһаллар. Сайыҥҥы сынньалаҥ кэмигэр үлэ эмиэ күөстүү оргуйар, быйыл үс лааҕыр үлэлээбит.
Оҕону эбии үөрэхтээһин киинигэр төрдүс сылын Степан Моисеевич Литвинцев дириэктэрдиир. Кини санаатын үллэстэр: “Быйыл Уус Алдан улууһугар оҕону эбии үөрэхтээһин киинэ тэриллибитэ 25 сыла буолла. Үйэ чиэппэрин анараа өттүгэр манна пионер дьиэтэ диэн баара, онно эбии дьарыктааһыннар буоллаллара. Онтон Сэбиэскэй Сойуус эстиитэ бу киин Үөрэх управлениетын дьиэтигэр үлэтэ-хамнаһа салҕаммыт. Кэлин улууспут баһылыга Алексей Федотов өйөөн, улуус бүддьүөтүттэн харчы көрөн, уруккута “Өркөн” киинэ тыйаатыра буолан турбут дьиэни өрөмүөннээн, иккис этээс эбии тутан, 2014 сыллааха үлэҕэ киирбиппит. Онон бу киин толору хааччыллыылаахтык үлэлииригэр, оҕолор сайдалларын туһугар диэн санаанан салайтаран, улуустан уопсайа 22 мөлүйүөн солкуобай көрүллүбүтэ. Билиҥҥитэ кииммитигэр 19 көрүҥҥэ араас куруһуоктаахпыт. Иистэнииттэн, уһаныыттан саҕалаан фольклорга тиийэ оҕолор сөбүлээн дьарыктаналлар, араас таһымнаах күрэхтэһиилэргэ кытталлар. Сайдыылаах оҕо улууспут кэскилэ буоларын өйдөөммүт, үлэбитигэр олус эппиэтинэстээхтик сыаһыаннаһабыт”.
Былырыын өрөспүүбүлүкэ үрдүнэн оҕолорго аналлаах “Junior Skills” оробуочай идэлэргэ туһаайыллыбыт күрэхтэһиигэ сэттис кылаас үөрэнээччитэ Милена Сивцева иис секциятыгар кыттан бастаабыт. Кинини Парасковья Николаевна Атласова уһуйар. Ону таһынан, маһынан уһанар уолаттар эмиэ араас күрэхтэһиилэргэ кыайан-хотон, ситиһиилэрэ баһаам. Оҕону эбии үөрэхтээһин киинэ Ил Дархан өйөбүлүнэн үлэлиир “Дьулуур” оҕо биир сомоҕо хамсааһыныгар биир бастыҥ кыттааччыта. Улуус үөрэнээччилэрин барыларын хабар “Уус Алдан кэскилэ” диэн уопсастыбаннай хамсааһын тэрийбиттэр.
Уус алданнар оҕо сайдарын туһугар, кырдьык, олус кыһаллалларын бэлиэтии көрдүбүт. Сайдыылаах, үөрэхтээх оҕо улууһун, төрөөбүт дойдутун кэскилэ, инникитэ буоларын өйдөөн, улууска маннык киин тэриллибитэ олус үчүгэй диэн санааҕа кэллибит.
Айтана Аммосова, «Саха сирэ» хаһыат, edersaas.ru