Уус Алдан улууһун Тулунатааҕы “Татыйык” уһуйааҥҥа бэрт интэриэһинэй тэрээһин буолан ааста. Уһуйаан 60 сыллаах үбүлүөйүн көрсө, үлэһиттэр күүстэринэн ”Оҕо сааһым оонньуура” (“Игрушки СССР”) диэн оонньуур түмэлин үөрүүлээх аһыллыыта буолла.
Манна даҕатан эттэххэ, оонньууру мунньан эрэ буолбакка, төһө кыалларынан бу оонньуур хас сыллаахха, ханна оҥоһуллубутун билиҥҥи сайдыылаах үйэбит хаамыытынан интэриниэттэн көрдөөн булан бэлиэтээтибит. Бу үлэни уһуйааммыт методиһа В.Н.Копырина сааһылаан оҥордо.
Ыалдьыттарбытынан уһуйааҥҥа өр кэмҥэ үлэлээбит бэтэрээннэрбитин ыҥырдыбыт. Түмэл аһыллыытын туоһулуур лиэнтэни педагогическай үлэ бэтэрээнэ, РФ үөрэҕириитин туйгуна А.Г.Сторожева, түмэл экспонаттарын булууга сүбэ-ама буолбут С.И.Мигалкина уонна иитээччи Т.П.Васильева быстылар.
Мусуойбут саамай былыргы оонньуурунан — 1960 сыллардаахха оҥоһуллубут тимир иистэнэр массыына. Үгүс оонньуурдары көрөөт даҕаны бары билэр буоламмыт, кини хас сыллаахха баар буолбутун туһунан кэпсэтиһии, маны тэҥэ, араас тэрээһиннэр, бырааһынньыктар буолбуттарын туоһулуур альбомнары, хаартыскалары көрөн, бэрт үчүгэй ахтыы киэһэтэ ааста. Онтон биһиги, үлэһиттэр, түмэлбит оонньуура хаҥыы турарыгар эрэнэбит.
“Саха сирэ” хаһыакка, edersaas.ru саайтка анаан Татьяна ВАСИЛЬЕВА.