Уус Алдан бөҕөһө Вадим Данилов аан дойду чөмпүйэнээтин боруонса мэтээлин иһин киирсиэҕэ (видео)
Болгария Пловдив куоратын «Колодрум» спорт киинигэр бэтэрээннэр ортолоругар классическай уонна көҥүл тустууга аан дойду чөмпүйэнээтэ салҕанар. Хапсыһыылар 62, 70, 78, 88, 100, 130 киилэҕэ диэри ыйааһыннарынан бараллар.
Бүгүн, алтынньы 14-гэр, күрэхтэһии бэһис күнүгэр, күбүөргэ С (46-50 саастаахтар) уонна D (51-55) бөлөх тустууктара таҕыстылар.
D бөлөххө мэтээл иһин барыта 69 бөҕөс туһунна. Онтон 15 киһи 70 киилэҕэ диэри ыйааһыҥҥа күүһүн холосто. Манна Уус Алдантан Вадим Данилов классификацияҕа Петер Конрад Керхер диэн Швейцарияттан сылдьар утарылаһааччытын 10:0 ахсаанынан хотто. Салгыы итальянец Доменико Пиччинини 3:1 ахсаанынан баһыйа тутта. Финал аҥарыгар Стефен Хортоҥҥа (АХШ) ыраастык хотторон кэбистэ. Онон боруонса мэтээл иһин Баяр Очировы (Арассыыйа) тустар буолла.
Бу ыйааһыҥҥа кыайыылааҕы быһаарар түмүк хапсыһыыга Стефен Хортон (АХШ) уонна Хамидреза Кенари (Иран) күөн көрсүөхтэрэ.
https://m.youtube.com/watch?feature=youtu.be&v=YL37Uksyhkc
Роман Попов, «Саха сирэ» хаһыат, edersaas.ru