close
Уус Алдан баһылыга куоракка үөрэнэр устудьуоннары кытта көрүстэ...
Кыһа - Олох-дьаһах

Уус Алдан баһылыга куоракка үөрэнэр устудьуоннары кытта көрүстэ

Бу күннэргэ Уус Алдан улууһун баһылыга Алексей Федотов Дьокуускай куоракка үөрэнэр устудьуоннарын кытта атах тэпсэн олорон көрүстэ. Маннык үгэс былырыыҥҥыттан олохтообут.

Быйыл көрсүһүү таһыма үрдээн, Уус Алдантан төрүттээх ХИФУ преподавателлэрэ кытыннылар. Ол курдук, ХИФУ юридическай факультетын декана, юридическай наука доктора Петр Гоголев, нуучча тылын уонна литэрэтиирэтин факультетын доцена, педагогическай наука кандидата Светлана Бурцева, ХИФУ научнай-чинчийэр үлэҕэ уонна естественнэй-математическай хайысхаҕа проректора, биология наукатын кандидата Константин Кривошапкин, улуус дьаһалтатын дьыалаларын салайааччыта Гаврил Тимофеев кытыннылар.
Баһылык кэнчээри ыччатыгар, улуус, өрөспүүбүлүкэ сарсыҥҥытын салайсыахтаах дьонугар кылгастык тыа хаһаайыстыбатын, тутуу, үөрэх, култуура, спорт эйгэтигэр ситиһиилэрин, кыһалҕаларын, инники соруктарын туһунан кэпсээтэ. Ол курдук, 2021 сылга “Манчаары оонньууларын” туруорсалларын, эһиилги Үөһээ Бүлүүгэ буолар оонньуу мас тардыһыыга сүүмэрдиир күрэхтэһиитэ Бороҕоҥҥо ыытылларын туһунан иһитиннэрдэ. 2017 сыл Өрөспүүбүлүкэҕэ Ыччат сылынан биллэриллибитэ. Манан сибээстээн, бэйэҕит санааларгытын киллэриҥ диэн эттэ. Улуустарын аатын ааттата сылдьар ыччаттарыгар Айталина Григорьеваҕа, Розалия Бурнашеваҕа, Николай Местниковка, Михаил Яковлевка махтал суруктары туттарда.

Спорт, дьиэ кэргэн уонна ыччат политикатын исписэлииһэ Евгения Аргунова улууска ыытыллар тэрээһиннэри, онно эдэр дьон кыттыытын билиһиннэрдэ. Уус Алдан улууһугар 6000 кэриҥэ ыччат олорор, үлэлиир. Кинилэр 17 уопсастыбаннай түмсүүлээхтэр.
“Бэрт Хара” түмсүү бэрэссэдээтэлэ Михаил Аржаков ааһан эрэр сыл түмүктэрин кэпсээтэ итиэннэ чопчу итэҕэстэргэ тохтоото. Ол курдук, уопсайа тоҕус көрүҥүнэн ыытыллар “Zemafest” күрэхтэһиигэ мэҥэ хаҥаластартан аҕыйах очукуонан хаалан, иккис миэстэни ылбыттарын иһитиннэрдэ. Хамаанданан көрүҥнэргэ бастаабыттар эрээри, биирдиилээн көрүҥнэргэ хотторон тахсыбыттар.

Устудьуоннары профориентационнай үлэ, үлэнэн хааччыйыы, нэһилиэктэрин инники дьылҕата, суол, тутуу боппуруостара, энергияны кэмчилээһин долгутар эбит. Сүрүннээн ыйытыылары ити хайысхаҕа туһаайдылар.
Кэпсэтии бүтүүтэ, Светлана Бурцева: “Аныгы ыччат төрөөбүт улууһун туһугар көрүүтэ, санаата уларыйбыт. Биллэн турар, бу үчүгэй. Ол эрээри, кэпсэтии тухары биир да оҕо нууччалыы тылынан санаатын этэрин истибэтим. Кэлин эдэр дьон нууччалыы суруйаллара, саҥараллара мөлтүү быһыытыйда. Онон төрөөбүт тылбытын сэргэ нуучча тылын эмиэ тэҥҥэ баһылыахтаахпыт”, – диэн санаатын биллэрдэ.

Людмила ПОПОВА

.bert-hara-2

#бүгүн: 1
0
0

Сайт матырыйаалларын ааптар көҥүлэ суох ылар бобуллар.