Саха сиригэр биэс бастыҥ үөрэх тэрилтэтин кэккэтигэр ханнык орто үөрэх кыһалара киирэллэрий диэн дьонтон ыйыттахха, бука, Дьокуускайдааҕы сервис технологическай тиэхиньикумун биир бастакынан ааттыахтара. Маныаха саамай сүрүнэ — тустаах үөрэх тэрилтэтин базата уонна маастардара.
Быйылгыттан тиэхиньикум “Профессиональнай десант” диэн кууруһу үлэлэтэн саҕалаата. Манна бастакы хараҥаччынан Уус Алданнааҕы тиэхиньикум маастардара уонна устудьуоннара буоллулар. Кууруһу ВорлдСкиллс ыстандаартынан, туох баар ирдэбили тутуһан ыыттылар. Ол курдук, нэдиэлэ устата суфле пирожнай, верринаҕа десерт, карамельтан декор, мастика, антреме, тэриэлкэлээх десерт итиэннэ бриоши, хал килиэптэри оҥоро үөрэннилэр.
“Кууруска сүрүннээн биһиги “Кондитер дьыалата” компетенцияҕа уонна бу бүтэһик күммүтүгэр “Килиэп астааһына” компетенцияҕа сырыттыбыт. Түөрт устудьуон, биир преподаватель буолан кэллибит. Сарсыарда тоҕустан киэһэ биэскэ-алтаҕа диэри тилэри үөрэннибит. Биир эрэ күн маастар-кылаас көрбүппүт. Онтон атын күҥҥэ барытыгар бэйэбит оҥордубут. Бу тиэхиньикум куоракка саамай үчүгэй базалааҕынан биллэр. Онон элбэҕи туһанныбыт. Салгыы тиийэн үлэлиир былаан оҥоһуннубут”, — диэн Уус Алдан тиэхиньикумун маастара Алена Стрекаловская кэпсиир.
Тиэхиньикум 1 кууруһун устудьуона Мария Сыроватская, хас даҕаны утахтан өрүллэр хал килиэби астыы сылдьар кэмигэр быыс-арыт булан кэпсэттим. Мария этэринэн, саамай сүрүнэ, технологиятын таба туһаныахха наада эбит, уоннааҕыта үөрэннэххэ табыллыыһы диэн санаатын үллэстэр.
Биир нэдиэлэлээх куурус көрүөх бэтэрээ өттүгэр ааһан хаалла. Ол эрээри, ВорлдСкиллс курдук улахан чөмпүйэнээттэргэ устудьуоннары бэлэмниир преподавателлэр бэйэлэринэн үөрэппит буолан, куурус хаачыстыбалаах. Оттон маастар-кылаастары “Эдэр профессионаллар” национальнай чөмпүйэнээт үрүҥ көмүс призера Мариетта Байская, кыттааччы Дайаана Филиппова ыыттылар.
Людмила ПОПОВА, “Саха сирэ” хаһыат, edersaas.ru
Айталина ПЕТУХОВА хаартыскаҕа түһэриилэрэ.