Бу күннэргэ өрөспүүбүлүкэтээҕи көрдөрөр-иһитиннэрэр эйгэ суруналыыстара Өймөкөөн улууһун киинигэр Уус Ньараҕа ититии сезона саҕалана илик уонна итии уу суох диэн олоҕо суох иһитиннэриини тарҕаттылар.
edersaas.ru
Онон онто суох уустук балаһыанньа аһара сытыырхайда. Итии Уус Ньара дьиэлэригэр балаҕан ыйын 6 күнүгэр бэриллибитэ. Үөскээбит балаһыанньаҕа икки тэрилтэ — “Теплоэнергосервис” филиала уонна “Персей” ХЭТ ким хайдах дьаһаныахтааҕын ититии сезона саҕаланыытыгар өрөспүүбүлүкэ таһымыгар саҥа быһаарсан эрэллэрэ – киһи санаатыгар баппат дьыала. Сайыны быһа үп суоҕар сигэнэн, “Персей” ХЭТ канализация тиһиктэрин өрөмүөннээбэтэх.
Өрөмүөнү кэмигэр ыыппатах тэрилтэҕэ “Теплоэнергосервис” тэрилтэ “уонунан мөлүйүөн суумалаах иэскитин төлөөҥ” диэн кыһарыйан туран, иэһин сороҕун төлөттө. Ол эрээри “Персейтэн” кэккэ ирдэбили эбии толороллорун ирдээн, бу күннэргэ “Теплоэнергосервис” акционернай тэрилтэ канализация тиһигин итиигэ холбоокко турар. Сайыны быһа толорботох сорох үлэтин тэрилтэ тымныы түһүөр диэри аҕыйах хонук иһигэр оҥоро охсубата биллэр буоллаҕа.
Ыйы быһа муниципалитет планеркатыгар өрүттэр мөккүһүүлэрин иһиттилэр да, күттүөннээх быһаарыы күн бүгүҥҥэ диэри ылылла илик. “Теплоэнергосервис” акционернай тэрилтэ пресс-сулууспата Уус Ньараны бу тэрилтэ хайдах курдук “быыһаан” эрэрин туһунан интернет-сайтары толордо. Сайын устата үлэ хаамыытын саҕана бу сулууспа айдааны тардыбыта буоллар, быдан көмөлөөх буолуо эбитэ буолуо.
Айдаан өссө биир төрүөтэ – өрөспүүбүлүкэтээҕи Субсидия түҥэтэр агентство “Персей” ХЭТ оҥорбут өҥөтүн харчытын кэмигэр ыытан испэтэ. Бу тэрилтэ үстүү ый үбүлээһини уһатарыттан, маннык уустук балаһыанньа үөскээтэ. Тымныы полюһунан аатырар улуус киинин канализациятын тиһигэ кыстыкка күн бүгүҥҥэ диэри бэлэмэ суоҕа – сайыны быһа үбүлээһин оҥоһуллубатаҕыттан.
Өрүттэр тыл тылларыгар киирсэр кэмнэрэ кэллэ. Туох да буруйа суох, бары төлөбүрү кэмигэр оҥоро олорор олохтоох нэһилиэнньэ икки улахан тэрилтэ мөккүөрдэриттэн сылтаан аны кыһын канализациялара тоҕута баран, эрэйдэнэр уһукка киирдэ. Бүгүн түүн Өймөкөөҥҥө 23 кыраадыс тымныйда. Бу Саха сирин үрдүнэн саамай тымныы көрдөрүү. Өймөкөөн улууһа тымныытынан инники күөҥҥэ сылдьарын күннэтэ тымныйан эрэринэн бигэргэтэр. Онон үөһээҥҥи салалта орооһон, бу боппуруос болҕомто киинигэр ылыллара уолдьаста.
Елена ПОТОЦКАЯ, «Саха сирэ» хаһыат, edersaas.ru