close
Уус Ньараҕа «Голубые береты» ыалдьыттаата
Олох-дьаһах

Уус Ньараҕа «Голубые береты» ыалдьыттаата

Өймөкөөн улууһун киинигэр кэлиҥҥи кэмҥэ Улуу Кыайыы күнүгэр уонна Арассыыйа күнүгэр патриотическай ырыаны пропагандалыыр биллэр айар кэлэктииптэр кэнсиэрдэрэ ыытыллар тэрээһиннэргэ  духуобунаһы бөҕөргөтүүгэ өйөбүл буолаллар.

edersaas.ru

Арассыыйа күнүгэр Уус Ньараҕа аатырбыт «Голубые береты»  ыалдьыттаата. Айар кэлэктиип РФ Оборона министиэристибэтин састаабыгар баар Салгын десанын сэриилэрин ырыа уонна үҥкүү ансаамбылын быһыытынан үлэлээбитэ 33 сыл буолла.

«Голубые береты» Тымныы Полюһугар бастакы сырыылара. Кинилэр Нерюнгрига уонна Томмокка кэнсиэрдээн баран, «Халыма» федеральнай айан трассатынан түүн айаннаан кэлбиттэрэ. Ыраах  айантан төһө да сылайдаллар, ыалдьыттар Уус Ньара киэн туттуутугар — Кыайыы болуоссатын Мемориальнай комплексыгар сылдьан, дойдубут көҥүлүн, эйэлээх олох иһин олохторун толук уурбут дьоҥҥо анаммыт монумеҥҥа сүгүрүйэн ыллылар.  «Хаҥалас» көмүс хостуур хампаанньа оройуон олохтоохторугар бу комплексы оҥорон, ыччаты иитиигэ дьоһуннаахай бэлэҕи оҥорбутун сөҕө-махтайа көрдүлэр-иһиттилэр.

Бу олус дириҥ ис хоһоонноох болуоссакка Уус Ньараҕа буолар бары суолталаах  тэрээһиннэр ыытыллаллар. Манна олохтоохтор өрөбүллэригэр кэлэн сынньанан, дьаарбайан бараллар.

— «Голубые береты» ансаамбыл кэнсиэрдиир сыанатын Кыайыы Мемориальнай комплексын аттыгар туруорбуттара олох сонуннук көһүннэ. Маннык кэнсиэрдэр биһиэхэ, ыраах хоту дойду олохтоохторугар, биир халыыбынан барар олохпутугар сибиэһэй тыыны киллэрэллэр. Оннооҕор соҕуруу «материкка» уоппускабытыгар күүлэйдии да бардахпытына, кэнсиэр харчыта ыараханыттан да, бириэмэ суоҕуттан да сылдьыбакка кэлэбит. Оттон манна буор босхо ытыспытыгар ууран турардыы, чугастан көрөрбүт, аатырбыт дьону кытта хаартыскаҕа түһэрбит наһаа үчүгэй, — диэн санаатын үллэстэр Уус Ньара олохтооҕо Елена Кузина.

Кырдьык, «Голубые береты» ансаамбыл кэнсиэригэр бэрт элбэх киһи мустубут. Ансаамбыл састааба 1991 сылтан уларыйа илик буолан, көрөөччү сөбүлүүр ырыаларын хото ыллаатылар. Айар кэлэктиип ырыаһыттара бары «РФ үтүөлээх артыыһа» суолталаах ааты сүгэллэр. Өскө кинилэр «итии туочукаларга»  саллааттар дууһаларын кылын таарыйан, сэрии уоттаах кэмигэр санааларын бөҕөргөтөр эбит буоллахтарына, билиҥҥи эйэлээх кэмҥэ ыччаты патриотическай иитиигэ уонна дьону духуобунаска көҕүлүүр соруктаахтар.

Уу -Ньара олохтоохторо «Хаҥалас» көмүс хостуур тэрилтэҕэ суолталаах бырааһынньыктарга Арассыыйаҕа биллэр айар кэлэктииптэри аҕалан, күннээҕи түбүктээх олохторун сэргэхситэллэригэр барҕа махталларын тиэрдэллэр.

Елена ПОТОЦКАЯ, «Саха сирэ» хаһыат, edersaas.ru

Хаартыска — батсааптан.

 

 

 

#бүгүн: 2
2
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

один + четыре =