Бүгүн Өймөкөөн улууһун олохтоохторо, ытык-мааны ыалдьыттар тапталлаах бөһүөлэктэрэ — Уус Ньара тэриллибитэ 80 сылын күргүөмүнэн тахсан үөрүүлээхтик бэлиэтээтилэр.
Тэрээһин сарсыарда Уус Ньара бөһүөлэгин Халыма суолугар анал кириэһи сибэтии гыныыттан саҕаланна. Дьиҥэр, кириэһи нэдиэлэ анараа өттүгэр туруорбуттара. Аҕабыт Феодор анал кириэһи алгыыр этиитигэр бу ураты суолталаах суолунан элбэх киһи сылдьарын бэлиэтээтэ. Бары этэҥҥэ айанныылларыгар көмөлөһөрүн ыйда. Түгэнинэн туһанан, бу тэрээһиҥҥэ бары өттүнэн өйөбүл буолбут, көмөлөспүт «Хаҥалас» хампаанньа салайааччытыгар Александр Караська махтанна.
Бу ураты бэлиэ күҥҥэ Уус Ньара олохтоохторо Успения Сибэтиэй Богородицатын храмын хапытаалынай өрөмүөн кэнниттэн көрөн олус үөрдүлэр. Санатар буоллахха, бу таҥара дьиэтэ 11 сыл анараа өттүгэр тутуллубута. Төһө даҕаны саҥатыгын иһин, оччотооҕуга сыыһа-халты тутан, дьиэ акылаата түөрэ-лаҥкы барбыт, хамнаабыт. Онуоха бу Сибэтиэй дьиэ тоҕо саргы сатаҕай туруоҕай диэн “Хаҥалас” хампаанньаны тэрийээччи Александр Карась үбүлээн, бу аҕыйах хонуктааҕыта өрөмүөннээн бүтэрдилэр.
Алексей Васильев, Уус Ньара бөһүөлэгин олохтооҕо:
—Таҥара дьиэтин саҥардан, көннөрөн өрөмүөннээбиттэриттэн олус үөрдүм. Олохтоохторго Уус Ньара төрүттэммитэ 80 сыллаах үбүлүөйүгэр бэртээхэй бэлэх буолла. Уопсайынан, Александр Карась улуус сайдарыгар олус көмөлөһөр. Кини Өймөкөөн улууһун дьиҥ-чахчы патриота.
Бу үөрүүлээх күнүнэн олохтоохтору аатырбыт «Синяя птица» уонна «Белый орел» ансаамбыллар кэнсиэртээн э5эрдэлээтилэр.
Урукку өттүгэр улаханнык биллэ-көстө сылдьыбыт “Синяя птица” уонна “Белый орел” бөлөхтөр ырыаны-тойугу көҕүлүттэн туттулар. Манна даҕатан эттэххэ, “Белый орел” бөлөх музыкальнай альбомнара хастыы да мөлүйүөнүнэн ахсаанынан тахсыбыта, “Как упоительны в России вечера” ырыалара аан дойду үрдүнэн саамай элбэхтик ылланар ырыа быһыытынан Гиннесс рекордугар киллэриллибитэ. Бу бөлөх саҥа ырыалара элбэх. Олору Уус Ньара олохтоохторо астына-дуоһуйа иһиттилэр.
[vc_video link=»https://youtu.be/Gxk0i-uK6FM»]
Александр ТАРАСОВ, “Саха сирэ” хаһыат, edersaas.ru