Бу былырыын сайын буолбут быһылаан уонна дьоруойдуу быһыы туһунан биһиги сайтпытыгар «Хаайыы үлэһиттэрэ ууттан дьону быыһаатылар» диэн иһитиннэриибэр аахпыт буолуохтааххыт.
Вера МАКАРОВА, «Саха сирэ» хаһыат, edersaas.ru
Санатар буоллахха, 2016 сыл от ыйын 2 күнүгэр Покровскай куорат таһыгар Өлүөнэ эбэҕэ дьон суорума суоллана сыспыта. Кинилэр дьоллоругар, чугас холуонньа үлэһиттэрэ балыктыы сылдьыбыттар. Ити күн үс эр киһи уонна дьахтар мотуордаах тыылара түҥнэстэн, төрдүөн ууга биирдэ баар буола түспүттэр. Саатар быыһанарга аналлаах сэлиэччиктэрэ суох эбит.
Кинилэр “быыһааҥ!” диэн ыксаабыт хаһыыларын чугаһынан балыктыы сылдьыбыт Мохсоҕоллоохтооҕу 6 №-дээх кытаанах эрэсиимнээх холуонньа үлэһиттэрэ Владимир Злыденнай, Игорь Сергеев уонна Юрий Киргинцев истибиттэр. Мүнүүтэ да саарыы барбакка, бу уолаттар мотуордарын собуоттаан, хаһыы иһиллэр сирин диэки устубуттар.
Ууга булумахтана сылдьар дьону өрүс дохсун сүүрүгэ бэйэ-бэйэлэриттэн тэйитэн, аллараа диэки илдьэн испитэ балаһыанньаны өссө уустугурдубут. Бэрт эрэйинэн да буоллар, холуонньа хорсун уонна сымса үлэһиттэрэ сыралаһан-сыралаһан, хас биирдиилэрин чугастааҕы кытылга таһаарбыттар. Онно эмсэҕэлээбиттэргэ бастакы медицинскэй көмөнү оҥорбуттар. Итини таһынан, уолаттар былаҕайга былдьана сыспыт дьон тыытын уонна ууга түспүт сорох малларын эмиэ өрүһүйбүттэр.
Бүгүн РФ Накаастабылы толорор федеральнай сулууспатын Саха сиринээҕи управлениетыгар Владимир Злыденнай, Игорь Сергеев уонна Юрий Киргинцев«За доблесть в службе» диэн биэдэмистибэ мэтээлинэн наҕараадаланнылар.
Управление начаалынньыга, ис сулууспа полковнига Владислав Дзюба хорсун сотрудниктарыгар наҕараадаларын туттарарыгар, махтал, киэн туттуу тылларын эттэ. Бу киһини үөрдэр үчүгэй сонуну управление пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: УФСИН пресс-сулууспата.