Бэс ыйын 7 күнүгэр РФ бэрэсидьиэнэ Владимир Путин Москва бириэмэтинэн 12 чааска, биһиэнинэн 18:00 чааска, 16-с төгүлүн быһа эфиргэ тахсыаҕа.
edersaas.ru
2001 сыллаахха ыытыллыбыт бастакы быһа сибээскэ 400 тыһыынча ыйытыы киирбититтэн, Владимир Владимирович 47 боппуруоска хоруйдаабыта. Эфир кэмигэр сибээскэ Москва, Санкт-Петербург олохтоохторун таһынан, Калининград, Мурманскай, Казань, Ростов-на-Дону, Екатеринбург, Новосибирскай, Владивосток, Краснодарскай кыраай дьоно бэйэлэрин долгутар боппуруостарын биэрбиттэрэ.
Дойду бэрэсидьиэнэ саамай уһуннук 2013 сыллаахха быһа эфиргэ тахсан, биэс чаас кэриҥэ нэһилиэнньэ ыйытыытыгар эппиэттээбитэ. Оттон былырыын 2,6 мөлүйүөн ыйытыы Россия араас муннуктарыттан уонна тас дойдулартан киирбитэ. Дьон ордук хамнас, үлэ ырыынагын, доруобуйа харыстабылын, ОДьКХ, ис бэлиитикэ боппуруостарын интэриэһиргиир. Быһа сибээскэ Дьокуускай куорат олохтоохторо – уопсастыбанньык Иван Степанов, урбаанньыт Петр Чиряев уонна Максим Егоров кыттыбыттара эрээри, Путиҥҥа ыйытыы биэрбэтэхтэрэ. Уопсайа бу тэрээһиҥҥэ 200-кэ киһи кыттыбытыттан, саалаҕа олорооччулартан алта эрэ киһи бэрэсидьиэни кытары кэпсэппитэ.
Оттон сарсын ыытыллыахтаах быһа сибээскэ боппуруостары хомуйуу ааспыт ый бүтүүтүттэн саҕаламмыта. moskva-putinu.ru саайтка сурулларынан, бэс ыйын 5 күнүнээҕи туругунан, сибээс бары көрүҥүнэн 1 мөлүйүөн кэриҥэ ыйытыы киирбит. Наука, экэниэмикэ, бэнсиин сыанатыгар, социальнай хааччыйыы, хомунаалынай өҥө, экология салааларыгар ордук элбэх боппуруос киирбит.
Биэрии «Бастакы», «Россия-1», «Россия-24», «ОТР» ханаалларынан көстүөҕэ уонна «Маяк», «ВестиFM”, “Россия радиота” радиостанцияларынан барыаҕа. Боппуруостары 8-800-200-40-40 нүөмэргэ эрийэн биэриэххэ, биитэр 0-40-40 нүөмэргэ СМС ыытыахха сөп. Итиэннэ «ВКонтакте» уонна «Одноклассники» социальнай ситим нөҥүө эмиэ ыйытар кыах бэриллэр.
Анивера АКИМОВА, edersaas.ru